Shillong: Ka yalang ha Khliehshnong, Sohra ynne ka sngi da pynkhyrngiat bru ko hadien i jia haka 28 tarik, heiwa ki sordar chnong wa kiwa yahkhmat chnong da rai ki wym e laad de neini chakhmat wow yoh psiah ki baar jylla, da rai leh wow pyndam noh ya kiwon kiwon ki NOC wa da e cha ki baar jylla.
Ynne ka sngi da i sñiawkhia ya i chah thombor ha ka 28 tarik u bnai wa dep ha ka chnong Ichamati, ki soo tylli ki seiñbhalang wa kynthup ya ka KSU, FKJGP, HNYF, RBYF da pynman yalang jhan ki wa u Syiem deilang wa ki wakhroo yong ka Hima Sohra, ki sordar chnong yong ka chnong Mawlong, Wahlong, Majai, Sohbar, ki waheh chnong, kiwa synchaar chnong, ki Wahadadar, ki Executive Member yong ka Shella Confederacy wei kamjooh leh ya ki dkhot ka Miners & Exporter Association yong katai ka thaaiñ.
Hawa klam hadien wa wai ka yalang, u President ka Khasi Students’ Union, u Lambokstarwell Marngar da ong u wa lada ym ye de wow khyrngiat yong bru katni, daw man ko kawa eh wow khyrngiat yong bru won hadien neibhah ka seiñ ym kwah ko wow dooh chooh yei mynsien bru.
Da ong u wa waroh kiwa da poi cha ka yalang sñiawthooh ki wa ki baar jylla da sdang ki wow sñiawchit katni, wei da toh por wow pyrkhat thymme noh wow sdang khyndang noh ya ki baar jylla kiwa chong chnong wei kiwa da ksoh syndon ya ka khayi pateiñ ha ka thaaiñ.
Da pyntip u leh wa da rai wow khanglaad chisyndon ya i leh benami ha katai ka thaaiñ wei da phah leh ya kiwa synchaar chnong wa lada ki em ki iwon iwon i suba toh wow chim ya i pyrtuid yong kita ki bru wei ka seiñ daw leh ko ya iwa emkaam katkam ka aiñ.
U Wellbirth Rani uwa man u President ka Federation of Khasi Jaintia and Garo Peoples, da pyntip u wa kiwa khayi ha katai ka thaaiñ kawa em ha khappood da pyntip ki joor bha i leh benami kawa da booh yei eh ya kiwa synchaar Hima leh. Da pyntip u leh wa neiliang ka seiñ daw booddien ko ya kani ka kaam, deiwa pynrap wa lada ye wow khanglaad syndon ya ka benami wei da ini da jop chwa mar chiteiñ yaka yaleh.
Beiñ u Sadon ya ki pulit wa pynphet ya ki baar jylla cha Assam
U President ka Hynniewtrep National Youth’s Fronth (HNYF), u Sadon Blah da ong u wa yah noh ya ki baar jylla kamwa 400 ngut da ki pulit ka Meghalaya wa Assam, pynyoo ko wa kitu ki bru toh kiwa na Bangladesh kiwa psiah cha kani ka jylla lyngba ka Assam. Da beiñ u ya ki chnat pulit kiwa da yarap wow pynphet ya ki baar jylla na katai ka thaaiñ katwa ka takit dang lai ko wow chem ya kiwa emkti thombor ha ka 28 tarik.
U Sadon da pynrem u ya ini i leh yong ki pulit ka jylla Meghalaya wa Assam deiwa pynbaad wa em ka leh chiliangkhmat hawa yatoh wa ki seiñbhalang wa ki baar jylla hawa yatoh wa kam kini ki jia.
Discussion about this post