Ka Balang Presbyterian Dkhiah, East Jaiñtia Hills District lyngba i pyllait khubor u Rev. D. Nongtdu Pastor In-charge, TBn. L. Phawa Chairman Balang wa u Keyboy Phawa ,Secretary Balang da khut wei pdiang sñiawbha ya waroh ki para wa ngait cha ka yaseiñ KJP Synod Mihngi 2020 kawa khadphra ka wow man naddooh ka 12 hadooh 15 tarik uni u bnai March 2020.
Neibynta i bha i miat lang waroh ka Balang ryngkat i krehlang waka chnong da yakut wow pyntip paidbah ya kini ki emkaam:
Hawa yatoh wa i rukom pynyieñ ya ki kari kiwa wan na ka thaaiñ Sutnga, Umkiang, Lumshnong, Khliehriat wa kiwi kiwi u psiah ki na u sarok napoh ka chnong Dkhiah East wei i thaw pynyieñ kari u man ko ha Madan Moothathlen, hajan loom tlep-bru ka Balang Presbyterian Dkhiah ya ki kari khian, katwa ya ki kari heh u pynyieñ harood sarok NH-06. Kiwa wan na Shillong, Jowai, Shangpung, lyngba ka Lad Rymbai wei kamjooh ka Bypass u pynyieñ kari ki cha Loom Liar Pai Thlu, Khlieh Suwar, Khlieh Rimet wei harood yong u sarok NH-06. Waroh kini ki thaw pynyieñ kari em ki soodong yong ka thaw pynman yaseiñ. Da kyrpaad ya kiwa wan yaseiñ khamtam ya kiwa yah kari wow sñiawbha u burom wei kohngooh ya kiwa pynlai kari wa ki Volunteer ha ki thaw pynyieñ kari khnang wow ya biang lang ya waroh. Neibynta ki VIP u lai ki na u sarok uwa lai cha yung mane wei u poi ki hadooh ka thaw man yaseiñ.
Neibynta i chongkun yong ka chakri Blai ka Balang ryngkat wa i ya krehlang wa ka chnong, da yakut wow chah u dai du ya ki dukan ja wei cha kiwa da yohbor na ka chnong, ya ka yutip wa rap bniah heiyatoh wa i booh dukan, ye wow Phone ha kini ki number 7005505038 / 9615605477. Ym chah ya kiwon kiwon wow wan dai ya kiwi won ki jait mar kam ki kot, ki syntu, ki tiar ki tar wa kiwi kiwi.
Kiwa klam ha ka Sngi U Blai wow saam ya ka khubor i ktien U Blai ha i por 10:30 AM toh u Rev. (Dr). B. Sohkhlet wa ha i por 1:30PM won u Rev. S. S. Majaw katwa ha i por 6:30PM u Rev. H.K. Nongbsap.
Discussion about this post