Ka tamasa Meghalayan Age da sdang yaka ynne ka sngi ha Thadlaskein, Lad Mukhla West Jaiñtia Hills.
Kani ka tamasa kawa em i thmu wow booh yaka Meghalaya haka Map ka pyrthai kam ka thaw uiñke suwari daw pteiñ ko hadooh ka 14 tarik wei u pynkut yaka deiwa pynman yaka “National Tourism Conclave”.
Ya kani ka National Tourism Conclave ye wow wan embynta lang da u Union Tourism Minister u Prahlad Singh Patel, DoNER Minister u Dr. Jitendra Singh, Union Minister of Sports and Youth Affairs u Kiren Rijiju, Jal Shakti Minister u Gajendra Singh Shekhawat wa kiwi kiwi.
Nyngkong da thmu wow pynman ya kani ka tamasa wa chi tayaw deiwa em i chong Hot Air Balloon, Glamping, Caving, ka tem ka put wa kiwi kiwi ha i rukom wa heh wa kyrpang tangwa da pynkhian noh yaka neidaw wa bood ya ki kyndon wa da booh heiyatoh wa i chait i khiah.
Ynne ka janmiet ha i Campsite da sdang ya kani ka lympung heiwa da pynlait yaka kot “The Meghalayan” kawa em ki parom napoh ka jylla kiwa pynwandur yaka jylla kawa da pynlait da u montri rangbah u Conrad K. Sangma hei emlang ki montri kam u Snaiwbhalang Dhar, Comingone Ymbon wa u MLA ka thaaiñ u Wailad Shylla.
U Conrad hawa e yei klam da ong u wa ka Meghalayan Age toh i pyrchang ka sorkar jylla wow pynyoo rong ya iwa phær wa em hapoh ka jylla. “Lyngba kani ka tamasa da yaleh i wow ya krehlang wa ki Tour Operators, ki Media, Bloggers wa kiwi kiwi yow pynyoo cha ki yei spah ka rymaw, ka dustur riti wa i rukom im ki bru.”
Chooh da ong u wa kani ka tamasa toh wow lehkmen yaka jylla Meghalaya wei da pynwandur yaka heitæ i rukom yow pynku ya ki nong Meghalaya kiwa maya yeiwa leh ki wei ym toh ware chaphang ka poisa næ i naam, kani toh yeiwa bood yeiwa ngait phi wa iwa sñiaw phi.
Da pynsñiaw u leh wa haki snem wow wan daw pynheh chooh chooh ya kani ka tamasa yow taan ya kiwa uiñke suwari cha ka jylla. “Ini toh i sang wei man ko ka kawa miat, wei kwah ki wow rah ka chaphrang wei dang em boon kiwa ye i u leh wei wow pynyoo rong chaphang ka Meghalaya iwa ym pu em u yoh u pynyoo.”
Discussion about this post