Jowai: U sarok na Mookympad chadooh Sakhain, toh u sarok wa emkaam tam ya ki paidbah chong chnong katai ka chnong kawa haap ha East Jaiñtia Hills District, Elaka Sutnga, wei da maad ki yei eh hadooh kamwa 20 lane 25 snem kattu na i sih uni u sarok.
Ki manbei katai ka chnong da maad ki chawa palat pood i eh khamtam hawa pun wa kha.
“Ki para chnong yong nga da hap ki wow kha khon ha chiteiñ luti ha i por wa yah ki cha i thaw sumaar”, da ong kawi ka manbei ha katai ka chnong.
Katai ka chnong em ko ar bynta- ka Sakhian wa ka Moolimen kawa mih naka chnong Sakhian wei da yoh leh ar waheh chnong.
Ki waheh chnong da pyntip ki wa da chna nyngkong dooh ya kani ka sarok yong ki toh heipor wa dang man MLA u Oliverneat Chyrmang kamwa 20 snem nachwa, hadien itæ da jop u Shitlang Pale uwa da rem biang wei jop sa u Hopeful Bamon wei katni da jop biang u Pale na ka Party Congress.
“I da lai ood i man i por cha kiwa mihkhmat yong i, tangwa ym ap ki, lait noh u Shitlang Pale uwa da pynchna du chisien ya uni u sarok ha i por wa ma u kam u MLA yong kani ka thaaiñ”, da pyntip u waheh chnong katei ka chnong, u Polstar Syrti.
U Hamrish Bamon u dkhot ka Dorbar Chnong da pyntip u wa ar ngut napyrdi ki khon u waheh chnong da kha khon ki ha chiteiñ luti.
Katai ka surok jngai ko du 6 Km wei da chimpor wow lai hadooh 45 minit ha i thaw 5 hadooh 7 minit hawa miat u sarok hawa lai na sarok bah.
“I dep i wow thoh cha ka chnat PWD wei da lai ood leh cha kiwa mihkhmat wot chadooh u Prestone ha ka sorkar warim wow yarap ya i, tangwa da kut du hei kular”, da pyntip u waheh chnong. Da pyntip u leh wa ha u snem 2018 wa 2019 leh da booh da i thoh tangwa ym em yoh jubab iyi iyi, da pynrap u.
Katai ka chnong em ko hadooh 1200 Vote napyrdi kamwa 325 yung. Man ko ka chnong kawa paawnam bha heiyatoh wa i bha palat u mooyong.
Na kani ka chnong da pynmih ya u mooyong wa man uwi na kiwa bha tam hapoh ri-loom Jaiñtia ya uwa tip kam u Brown Coal. Uni u jait mooyong toh uwa syad bha wei lyngba kani ka chnong da yoh dan iwa heh bha ya ka sorkar jylla, tangwa man ko kam kawi na ki chnong ha ka thaaiñ East Jaiñtia Hills kawa da chah iehbeiñ.
Neiliang ki paidbah katai ka chnong da kyrpaad joor ki yaka sorkar wow yarap ya ki hawa yatoh wa u sarok, tangwa da hap ki wow maad ya ki eh kiwa ha rukom.
Discussion about this post