Ka Para Legal Volunteers waka District Legal Service Authority EJH District chirup i krehlang waka Women Empowerment EJH District ha kani ka 9 tarik u Wisu da pynman ki yaka lehkmen kyrpang neibynta ki kynthai watip kam ka Women’s Day Celebration 2020 ha Ladrymbai, Datsimpein, EJH District.
Ka O. Tyngkan OC Women PS Khliehriat hawa e yei klam ha kani ka sngi da batai pynche ko yaki aiñ wa yada yaki kynthai nei chah ban beiñ ha yung ha sem watip kam ka Domestic Violence, da batai haroh ko yaka aiñ wa yada yaki kynthai ha ki thaw khih thaw kreh wei da kyntu ko ya kawi pa kawi ka kynthai u wan mih cha Women PS wa em ha Khliehriat lada em iwon i won i chah lehbeiñ hei im yong ki khnang yow yoh ki i yarap.
Heijooh i por da klam ko leh chaphang ka Cyber Crime heiwa da kyntu ko yaki paralok kynthai wow syndong bha ki hawa pynemkaam yaki WhatsApp, Facebook wa kiwi neibhah boonsien jooh sñiawsuk sñiaw chaniah i u phah ki dur kut jait cha ki lok i tangwa wanrah ko i sñiawsih hadien habood.
Ka Rinibeth Patlong Ex-Field Mentor FHI 360 hawa e yei klam da yaroh ko yaki kynthai neibhah kat nang mih ki sngi da yoo wa ki kynthai dang ku ki ha waroh ki liang, nadooh u pyndap ha yung ha sem hadooh u e buit e budia ha chnong ha thaw. Da ong haroh wa ki kynthai katni ymtoh kam nachwa kut haki soo kynroh donhi wei da sakhi wa da em kiwa da ku chadooh ki haw haw, da em kiwa man kiwa yah lieñsuiñ, ki sahep wa kiwi kiwi.
Da klam haroh yei emkaam u ya ryngkat hapyrdi ka kynthai wa u chynrang tang wym hoi u mylliñ won wa u chynrang toh u khlieh ka yung katkam ka riti dustur yong i, da ong haroh wa ka sorkar katni da pynkup ko chiboon ki hok heiyatoh u yada yaka kynthai tangwa da pynkynmoo won wa ymhoi won u mylliñ kam ki kynthai yaka kamram kam ki kynthai heiyatoh ha yung ha sem, ha chnong ha thaw wot hadooh i akor burom.
Kiwi tawon wa e yei klam kynthup ya u Piwell Shylla, ka Rimaya Manner, Dr. P. Shylla wa kiwi kiwi haka yalang wada pynlai daka Janika Siangshai, Para Legal Volunteers EJH District, i klam pdiang da yoh na u Ti Suchiang, waheh chnong Lad Rymbai Datsinpein.
Da pynphooh pynpheiñ ya kani ka sngi daki rwai wa e sñiawbha daki ar ngut ki khynroo naka chnong Wapung ha chirup i wan sakhi lang ki seiñ manbei waphær waphær wa kiwa chong chnong yong ka Lad Rymbai.
Discussion about this post