Shillong: U Kennedy Khyriem ynne ka sngi da thap pyrtuid u kam u kyrtong ka Congress neibynta ka Election MP Rajya Sabha ka wow man ha ka 26 tarik uni u bnai.
Ya u Kennedy da synraan lang da uwa yahkhmat ka Congress u Dr. Mukul Sangma deilang wa ki MLA ka Party katwa thap pyrtuid u ha u Secretary ka Assembly.
Hawa klam cha ki laad pathai khubor u Kennedy da ong u wa ka Congress daw pyrchah bait ko ya ka Citizenship (Amendment) Act 2019 kamwa da dep pyrchah nadooh wa nachwa.
Da kyrmen u wa kiwi ki paralok MLA na i liang ka MDA daw pyrkhat ki chwa wow jied.
Chwa ya ini, u Dr. Mukul da beiñ u ya ka NPP kawa da kyrchaan ya ka CAA kamwa da yoo ha i klam ka MP ka Tura ka Agatha K Sangma ha Parliament ha ki bnai wa da dep.
Da ong u wa ka NPP toh chi mynsien ko waka BJP wei ini da che nei kyrchaan ka MP ka NPP na Tura.
Da ong u wa u Kennedy da thap pyrtuid u wow yakhun neibynta ki paidbah ka jylla wei da yooluti u wa kiwi ki paralok na MDA daw ya kyrchaan ya oo ha kani ka kynti wow jop kam u MP cha ka Rajya Sabha.
Kamwa man kattæ, ka yakhun neibynta ka MP cha ka Rajya Sabha daw man ko hapyrdi u kyrtong ka Meghalaya Democratic Alliance (MDA) u Dr. WR Kharlukhi katwa u Kennedy C Khyriem na ka Congress.
Lada ym em i kylla da kamwi won, u Dr. Kharlukhi uwa kyrchaan ka MDA kawa em 41 ngut ki MLA daw jop suk u neibhah wa ka Congress da em ko du 19 ngut ki MLA ha ka yung kawa em 60 ngut ki MLA.
Discussion about this post