“Hapoh ka Shillong District Jail ki koidi wa da chah kset da em ki waroh 422 ngut ki chynrang wa 18 ngut ki kynthai, waroh da poi ki 440 ngut tangwa da chna wa toh u booh 135 ngut ki chynrang wa 15 ngut ki kynthai wa ki High Security 20 ngut ki chynrang iwa waroh toh u em 170 ngut,” da pyntip u AL Hek, montri ka chnat Home (Prisons) ynne hapoh ka dorbar mang poisa hawa jubab yeiwa kylli ka liang pyrchah.
Da pyntip u leh wa ka sorkar da dep ko wow mynjur yow pynheh yaka District Jail, Shillong deiwa mang poisa T. 8.46 lak kawa da e cha ka PWD (B) wei da dep leh wow khut Tender ya ini. Da pyntip u leh waka sorkar da mynjur ko T. 27.60 klur yow chna yaka District Jail wa thymme ha Nongstoin wei manda dep u chna ya kani, ki koidi na West wa South Khasi Hills kiwa em ha District Jail, Shillong; u kyrriah noh ki cha Nongstoin Jail.
Neiliang ka liang pyrchah, u HM Shangpliang, MLA ka Mawsynram da ong u wa ini da che bha hadooh katwon khynnia ki patok yong i wei du ha Shillong kawa toh u em du 170 ngut da kset 440 ngut wei ini da wanrah ko yei chitom hei thiah hei dem kiwa chah kset deiwa kylli leh iyi da leh yow pynduna ya ini i khynnia.
U Hek da jubab u deiwa ong wa manda dep u chna pynheh yaka District Jail, Shillong daw pynkyllooid ko ya i khynnia deiwa e thaw thymme ya 102 ngut kiwa chah kset.
U Shangpliang da kylli u leh wa toh hi mo iwa sakhiat wa ki koidi kynthai wa em 18 ngut ha Shillong Distirct Jail da booh yaki ha du iwi i kamra heiwa u Hek da jubab u wa toh iwa sakhiat deiwa ong leh wa yaki kynthai da chna wa hoi u sah ki 15 ngut iwa mut wa tam du 3 ngut donhi.
U Shangpliang da ong u wa heipor wa lai pait yaki kynthai hapoh kani ka Jail da chem wa waroh chong ki hajrong palong wei ym em thaw yaki wow lai wow uiñ ki wei da em du kawi ka paikhana wa du kawi ka thaw sum wa khian. Iwa tyngkheiñ yei hukum ka Supreme Court wa ki koidi leh em ki ka hok wow im kam ki bru.
U Hek da pyntip u leh wa ki CCTV wa da pyndait kiwa em 22 tylli ym em de krehkaam ki.
Discussion about this post