U montri rangbah ka jylla Meghalaya u Conrad K. Sangma deilang wa u symbood montri rangbah ka jylla u Prestone Tynsong, u montri ka chnat poh yung u Lakhmen Rhymbui ynne da lai pait ki yaka “Corona Isolation Centre” ha IIM Shillong, Nongthymmai wa ha Meghalaya Administrative Training Institute ha Mawdiangdiang.
Kini ki ar tylli ki thaw pynchong sah samen namo ki Isolation Centres daw ye ki wow booh palat 300 ngut ki bru. Kini ki Isolation Centre toh leh wow pynemkaam ya kitu kiwa emkaam yei sumaar. U Conrad da ong u wa yow leh ya ini emkaam yaki bru wei da dep sikai wow leh ya ini i kaam.
“Kini ki Isolation Centre toh kiwa da bood katkam ki kyndon wa da booh. Da booh leh ya waroh i emkaam kam wow pynkhreh. Yaki Mock Drill leh daw pynman ha kini ki thaw,” da ong u Conrad. U Conrad deilang wa kiwi ki heh sorkar, mynstep ka 28 tarik daw lai ki cha Tura yow pait yei pynkhreh. Daw lai pait yaka SMELC Building, kawa da pynkhreh kam ka “Isolation Centre” ha Tura.
“Daw pynman yalang O leh wa ki heh sorkar ka ri-loom Garo yow pait kammon da leh yow pynbiang yaki tiar ki tar wa emkaam hadooh ki baam neibynta ka ri-loom Garo waroh kawi,” da pyntip u Conrad.
Da pyntip u leh wa u Prestone Tynsong deilang wa u James K. Sangma wa u Lakhmen Rymbui da pynkit haki wow lai ki cha kiwi ki thaw ka jylla deiwa ya krehlang waki MLA yong ki jar jiar ki thaaiñ, ki bor District, ki NGO, ki seiñ niam wa kiwi kiwi.
U Tynsong daw pait u yaka East, West, South West Khasi Hills waka Ri-Bhoi, u James daw pait u ya waroh kawi ka ri-loom Garo katwa u Rymbui u pait u ya waroh kawi ka ri-loom Jaiñtia.
U montri rangbah da kyntu u leh ya ki paidbah wym toh u hær-rngu ki, u bood wei pynmyllien wow jngai uwi na uwi namo ka Social Distancing wei heipor wa thied baam ki yow thied du kat yeiwa emkaam ki. Da kular u leh wa ka sorkar da leh ko yow pynbiang ya waroh iwa emkaam yow lai bait waroh ha kini ki 21 sngi ka Lockdown.
Kam chibynta wow pait yei bood ki paidbah yaka Social Distancing ynne ka sngi wa wai dukan ha Shillong, u Conrad da lai hiar u cha ka yaw Nongmynsong, Shillong yow pynkynmoo yaki paidbah wow bood ki yaka Social Distancing.
U Conrad da ong u wa ha kam kini ki por i yajngai na uwi ya uwi toh kawa kongsan tam wow yada na u COVID-19 uwa da ktah ya kiwa boon hapoh pyrthai kamjooh hapoh ka ri.
Kamtæ da kyntu u ya waroh wow sdang u myllien ya ini wei wow pynchlur leh ya kiwi wow leh ki.
Discussion about this post