Jowai : Ha ka yung krehkaam ka District Early Intervention Centre (DEIC) kawa em ha ka Civil Hospital warim ha Jowai da pynman ya ka ‘Child Health Screening for Congenital Heart Diseases (CHD)’ namo ka sngi wow chem ya ki kjut wa yatoh wa u klongsnaam hapoh ka skhim Rashtriya Bal Swasthka Karyaqkram (RBSK).
Ka (RBSK) toh ka skhim ka sorkar bei kawa thmu yow chem ya ki kjut ha ki khynnah nadooh wa dang kha hadooh wa em ki 18 snem chwa u poi i cha u pood wa joor i.
Ya ini i thooh ya ki khynnah wa ye u em ya ki 28 jait ki kjut wa kynthup nadooh ki kjut khmat, i tkoh, kjut klongsnaam wa kiwi kiwi da leh da ka Block Mobile Health Team kawa da yoh sikai yow chem ya kiwa da tip kam ki 4D 1. Defects at Birth i duna ha i doh i pran nei por wa dang kha. 2. Deficiencies i duna ha ki khynnah lyngba i duna baam, vitamin wa kiwi. 3. Diseases ki jait kjut wa ye u em næ kiwa dang sdang ha ki khynnah. 4. Developmental Delays and Disabilities ki dak ki chin wa ye u ktah yei heh i san ki khynnah.
Kani ka Block Mobile Health Team toh kiwa da lai cha kiwa boon ki skur sorkar kamjooh leh cha ki chnong wa boon yow chem ya kini khynnah wa u em ya kini ki 4D.
Kamtæ ynne ka sngi ka Director of Health Service (DHS) lyngba ka National Health Mission (NHM) da pynman ki ya ka Child Health Screening for Congenital Heart Diseases (CHD) heiwa da wan ki Doctor yong ka Manipal Hospital, Bangalore yow eksamin ya kiwa boon wa ka Block Mobile Health unit da suba wa ye u em ya i kjut klongsnaam.
Hapoh kani ka skhim RBSK ya kiwa da dep pyntikna wa emkaam ki ya i sumaar daw yah ya ki cha Manipal Hospital Bangalore heiwa i bai lai bai wan bai baam waroh u su da ka sorkar.
Nachwa ya i sumaar wa chah jied hapoh ka RBSK jooh leh hapoh ka NEIGRIHMS tangwa neidaw wa haap yang slem yow chah sumaar, ka sorkar da dep soi MoU ko wa ka Manipal Hospital, Bangalore kawa ye u sumaar smat ya ki kjut klongsnaam.
Ynne ka sngi da wan hadooh 55 ngut ki wa wan cha kani ka CHD wei da jied ya 20 ngut ki wow chah sumar cha Bangalore.
Discussion about this post