I yaleh, i pynkhreh ki chnong ki thaw hapoh ri-loom Jaiñtia wow yada na u khñiang khlam COVID-19 nang joor ko heiwa da em ki chnong ki thaw wa da khang yaki luti syngkieñ wow psiah kiwa na baar ka chnong chapoh ka chnong.
Neiliang ka chnong Kharkhana, Amlarem Sub-Division, kamwa da leh kiwi ki chnong wow yakhun pyrchah yei poor ka kjut khlam COVID-19 da rai ki wow khang chipor ya u sarok wa lai lyngba ka chnong, u sarok Muktapur, Kharkhana, Borghat chadooh Lad Rymbai nadooh ynne ka sngi.
U chah u lai du ki kari wa yoh yaka Curfew Pass, wa ki kari wa da yoh bor na u waheh chnong kam kiwa lai thooh dawai næ lai booh bru wa kjut wa chitom.
Kamtæ da kyrpad ya ki lok wa na jan wa na jngai wow sñiawbha u chimkhia ya ini wei daw wai ya u sarok manda pyntip ka sorkar da iwi tawan.
U Asst. Secretary chnong u Deimonmi Bareh da pyntip u wa da khang leh u yah bru na kiwi ki chnong chapoh u pood u ang ka chnong, ym hoi u yalang paidbah palat 5 ngut chaneiñ hapoh chnong pohthaw, da khang leh ya ki khynnah wow yalehke bol ki, u yalehke Cricket wa kiwi ki jait yalang paidbah hapoh chnnong poh thaw. Ya i lai i wan ki tre chnnong næ palat chnong toh u e yutip cha u waheh chnong.
Hapoh Jowai leh da em ki dorbar chnong wa da khang yaki thaw psiah chapoh chnong deiwa booh leh yaki Volunteer, ha Mihmyntdu wa ki chnong wa em cha jan da booh da ki moo haki luti wow psiah chapoh ka chnong deiwa emlang leh ki Volunteer yow pait yei lai i wan ki bru.
Discussion about this post