Jowai: Ynne ka sngi ka District Surveillance Officer (DSO) hapoh ka IDSP yong ka West Jaiñtia Hills, ka Dr. H. Uriah da pyntip ko wa katkam wa man hi wa da em le ngut kiwa suba wa yoh ya u COVID-19 hapoh ka District.
Uwi wa suba wa chem chitom wow riñ mynsien wei ky’oh wei hanlada ym em u wan na kiwon kiwon ki thaw wa chah ktah leh da pyndep ya ki Test wei da chem wa ym em u khñiang COVID-19 wei da kyrriah noh na ka thaw wa kyrpang namo ka Quarantine Facility ha wow chah sumaar ha kiwi tawon ki thaw.
Da pyntip ko wa kattæ em ar ngut kiwa suba wa em ya uni u khñiang wei kini toh kiwa da wan na ki thaw wa chah ktah ha u COVID-19 pyn hapoh India wei uwi na kini ki ar ngut ym em u ha ka Registration Portal namo ki pyrtuid yong ki bru kiwa wan na baar jylla wei ym em u leh ha ka Helpline Registration Number wa da booh wei katkam wa man katni dang thooh tre cheiwon de lai u.
Sa uwi won toh uwa da wan nadooh ka 23 (Wisu) wei uwa da em pyrtuid ha ka sorkar wei em u hapoh ka Home Quarantine khlem mih næ lai cheiwon cheiwon leh wei da sdang em ky’oh u wei ynnin da pynhiar kpoh u wei hadien wa pyntip cha u Doctor yong ka chnong wa sah u wei da pynkit noh cha kani thaw sumaar wa kyrpang.
Da pyntip ko leh wa ya kini ki ar ngut daw chim ya ki Sample wow phah Test wei yooluti ko leh wow yoh ya ka Result hapoh 24 kynta.
Heiyatoh wa ka Contact Tracing namo wow booddien ya ki bru kiwa da yajan wa kini ki ar ngut, neiliang ka Dr. Uriah da pyntip ko wa ka chnat da sdang booddien ko ya kini ki bru kiwa da yajan wa kini ki ar ngut.
Kini ki ar ngut katni em ki hapyrdi i chah sumaar ha ka Quarantine Facility ha MCH, Jowai.
Discussion about this post