U montri rangbah ka jylla u Conrad Sangma kam chibynta i pyntip u cha ki paidbah heiyatoh wa u khñiang COVID-19 ynne ka sngi, da ong u wa da em 738 tylli ki Sample kiwa da chim yow phah leh Test heiwa na kini 667 ngut da pyntikna wa ym em ki ya uni u khñiang. 11 ngut toh kiwa da pyntikna heiwa uwi da khlaad katwa 10 ngut toh kiwa dang em ya uni u khñiang (Active Case) wei ym em ware ki. 60 ngut won toh kiwa dang yang yaka Result.
Heiyatoh won wa i rukom leh yaki Test, da ong u wa da em boon kiwa da kylli wa neiyi i daw wa ym em Test yaki halanda da dep ki wow pyntip cha ka sorkar. Da pynche u deiwa ong wa em kiwa tip kam ki High-Risk Primary Contacts kiwa man ki bru kiwa ya sahlang wa kiwa yajan dooh wa kiwa yoh ya u khñiang wei da leh nynkong yaki Test ya kini, pynbood won sa kitu kiwa da em ki dak ki chin kiwa yachem wa kiwa yoh ya uni u khñiang, dep te sa kitu kiwa em hei maa kiwa em leh ki dak ki chin kiwa lai cha kini ki thaw sumaar ka Bethany kiwa yachem wa uwa yoh ya uni u khñiang kiwa da dep pyntip cha ka sorkar.
Ya kitu won kiwa da lai cha ka Bethany Hospital hadien ka 24-03-20 kiwa da pyntip cha ka sorkar kiwa ym em yaki dak ki chin ym pu Test yaki tangwa toh u chong ki khop hapoh yung 14 sngi wei lada sdang ki u yoh ki dak ki chin wa chitom, toh u pyntip ki wut wut deiwa phone cha u 108.
Waroh kiwa ym em yaki dak ki chin (Asymptomatic) Category A wa kiwa em yaki dak ki chin wa mula mala (Symptomatic) Category B kiwa man leh kiwa da pynitkna wa em ki ya uni u kñiang ym emkaam yaki wow thiah Hospital. Da pyntip u wa katkam ki kyndon wada pynmih daka Ministry of Health & Family Welfare ka sorkar India, hap ki wow neh ha yung (Home Quarantine) lane ye wow kit yaki cha ki Corona Care Centre deiwa phone ki ha u 108.
Heiyatoh won waka wakreh ha i yung uwa yoh ya u COVID-19 kawa ka leh da yoh ko ya uni u khñiang, yaki 4 ngut kiwa yajan dooh ko wa sa ki 32 ngut kiwa yachem ko da chim ya iwa emkaam naki yow phah leh Test.
Da pyntip u leh wa u waheh chnong yong i chong kani kawa yoh ya uni u khñiang da phah lut u ya waroh kiwa yachem wa kani ka bru u chong bait ki hapoh yung. Da dep lai leh ki wakreh ka Health yow pynche chaphang ini waroh yow lait ki u sñiawthooh bakla.
Ya kitu won kiwa ym em thaw wa biang yow chong bait hapoh yung, ye ki wow paan yarap naka sorkar.
Chooh chooh da pyntip u wa katkam wa da chem, 80% kiwa yoh ya uni u khñiang hapoh pyrthai haap ki hapoh ka Category A (kiwa ym em yaki daki ki chin) wa Category B (kiwa em ki dak ki chin wa malu mala) kiwa ye u smaar pyn ha yung ki, wei du kitu donhi kiwa chitom joor kiwa ym ye de wow riñ mynsien emkaam ki wow chah sumaar haki Hospital wa da pynkhreh kyrpang kiwa haap hapoh Category C.
Katwa kitu won kiwa chitom joor wei kiwa da em chwa i kjut, haap ki hapoh ka Category D wei emkaam wow booh hapoh ICU kamjooh wow pyndait haki kor yarap wow riñ mynsien (Ventilators) wei ya kini da pynkhreh ha ki Civil Hospital, NEIGRIHMS, Dr. H. Gordon Roberts Hospital Care, Shillong wa ha Nazareth Hospital.
Heiyatoh won waka rep kwai, pathi wa u saroo; ya kini u chah wow kit yaki cha ki yaw ki haat hapoh ka jylla khlem wa khang tangwa deiwa booh leh yaki kyndon, katwa kiwa wan won na baar jylla ym chah yaki.
Neiliang u montri i chait i khiah ka jylla, u Alexander Laloo Hek da pyntip u wa napyrdi ki 10 ngut kiwa dang me ya u COVID-19 ha ka jylla, em kiwa chong wei sumaar hi ki pyn da ki yaki hi ha yung wei em kiwa sah ha ki thaw sumaar wa da pynkhreh da ka sorkar.
Da pyntip u leh wa kitu kiwa chong ha yung man ko katkam i kwah yong ki, neibhah pynsñiaw ki wa kwah ki wow em ha yung wei i thaw sah ki leh man i iwa heh iwa ye ki wow yada na kiwi.
Heiyatoh won wa ki ar ngut kiwa dang yoh thymme ya uni u khñiang ynne ka sngi, u Hek da pyntip u wa ya kini ki bru daw kyrriah noh cha ki thaw sumaar næ ki Corona Care Centre lada ym biang thaw sah ki.
Discussion about this post