Ka sorkar pyrdi lyngba ka Ministry of Home Affairs (MHA) da pynbna ko wa yaka Lockdown hapoh ka ri daw pteiñ biang yaka nadooh ka 4 tarik uni u bnai sa ar tayaw.
Kani ka Lockdown toh kawa krehkaam katkam wa da yabhah yaka ri deiwa kheiñ yaki thaw wa da ktah u COVID-19 kitæ ki Red (Hot Spot), Green wa Orange Zone.
Ki Green Zone toh kiwa ym em wa yoh COVID-19 hadooh katni kiwa kheiñ daki District lane ki District ki wym em de wa yoh COVID-19 ha kini ki 21 sngi.
Ki Red Zone lane ki Hot Spot District toh kitu kiwa boon kiwa yoh ya u COVID-19.
Ki Orange Zone won toh kitu kiwa em hapyrdi ka Red waka Green Zone.
Kini ki Zone toh kiwa daw pynbna daka sorkar pyrdi man ka tayaw heiwa ki sorkar jylla ym ye ki wow pynkylla ki.
Ha kini ki ar tayaw ha waroh kini ki Zone ym pu chah wow hær ki lieñsuin hapoh ka ri namo kiwa hær cha baar ri lait noh kitu kiwa hær neidaw ki kaam wa yatoh waka chait ka khiah kamjooh kiwa kit chipai.
Ki rel waroh u man hi ki kiwa khang lait noh kitu kiwa chah daka (MHA).
Ym chah leh u lai ki Bus kamai kiwa lai na kawi ka District cha kawi lait noh kiwa chah daka (MHA).
Waroh ki thaw puræ u man ki kiwa khang lait noh kiwa leh yaka Online/Distance Learning.
Ki Hotel kiwa chah u wai toh du kiwa kiwa pynemkaam ya ki daka chnat i chait i khiah, ki pulit, ki sahep sorkar kamjooh ki baar ri kiwa sahkut hapoh ka ri wa kiwa pynemkaam kam ki thaw leh Quarantine.
Waroh ki Cinema Hall, Shopping Mall, Gymnasium, Sport Complex, Swimming Pool, ki Park, ki Bar wa kiwi ki thaw yalang paidbah u man ki kiwa khang.
Waroh ki thaw mane leh u man hi kiwa khang yaki paidbah ym chah leh wow pynman yaki yalang niam.
Ha waroh ki Zone, ki bru wa da em 65 snem chaneiñ i rta wa ki khynnah wa hapoh 10 snem toh u neh bait ki hapoh yung lait noh wa emkaam ki heiyatoh waka sumaar yei chait i khiah.
Haki Red Zone ym chah leh wow lai ki Cycle Rickshaw, Auto Rickshaw, ki Taxi, ki Bus hapoh ka District kamjooh yow lai cha kiwi ki District.
Ki kari samen won u chah du ya kitu kiwa yoh bor wei toh u chong du arngut hapoh katwa yaki ar chaka won toh u chong samen donhi.
Haki Orange Zone won u chah yaki Taxi heiwa toh u em uwa yah kari wa arngut kiwa chong hapoh. I lai na kawi ka District cha kawi u chah du ya kitu kiwa yoh bor deiwa em uwa yah kari wa arngut hapoh.
Haki Green Zone won u chah leh ya kiwa boon ki kaam lait noh kitu kiwa da kdaw haneiñ. U chah leh yaki Bus deiwa chong ki bru 50% donhi hapoh wei ye u mih leh du 50% na waroh ki Bus. Tangwa ym chah u lai na kawi ka District cha kawi.
U chah leh i lai i wan ki kari kitmar na kawi ka District cha kawi kamjooh kiwa thylli.
Discussion about this post