Shillong: Ka sorkar jylla ynne ka sngi da klam che ko wa ki bru wa wan uiñ cha ka jylla Meghalaya na kiwi ki jylla ka ri India ymye ki wow liwan biang smat cha ki thaw wa wan ki khamtam kiwa wan na ki thaw wa chah ktah bha namo Red Zone.
Hawa pyntip yeini, u Symbood Montri Rangbah ka Meghalaya, u Prestone Tynsong da ong u wa kitu kiwa uiñ cha ka jylla daw chimpor ko ya ki wow liwan biang cha ki thaw wa wan ki la na ki thaw puræ næ ki thaw kreh yong ki.
Da ong u wa ini i rai yong ka sorkar toh wow bood ryntih yei phah wei booh kyndon yong ka sorkar pyrdi wei ya ini i kyndon da pyntip leh ha ki laad e yutip ka sorkar jylla.
Heiyatoh won wa ki tre jylla Meghalaya kiwa sah cha kiwi ki jylla ka thaaiñ mihsngi, ka sorkar nadooh mynstep da pynkhreh ko wow pdiang ya ki ha ki thaw psiah wa da booh heiwa daw em leh ki Doctor wa kiwi ki wakreh ka chnat i chait i khiah.
Ha iwi i liang won u Prestone da ong u wa ka Mobile App wa da pynmih da ka sorkar neibynta wow pynpsiah pyrtuid u man ko leh ka laad wow ye u booddien ya kiwa chong-kset namo Quarantine neibhah wa lyngba kani ka App ye wow tip cheiwon de lai ki, tangwa ka sorkar hi chem chitom ko wow booddien yeini ha ki thaaiñ palatsor.
Da ong u leh wa kam chibynta wow pyntikna wa ya kiwa leh ya ka Quarantine ymhoi u mih ki na ki chnong yong ki.
Discussion about this post