Shillong: Hadien wa poor smat ki dur wa pynyoo wa kiwa chong chnong ka Mawpyrthuh da kem wei pynyap ki ya kawi ka dngiem na iwi i thaw wa tip kam i Pohriat. Hawa yatoh wa ini, neiliang ka chnat Wildlife wa ki pulit ka Pynursla Police Station da lai hiar ki cha katai ka thaw nadooh ynnin i miet wei ynne ka sngi wa bood won da rah noh leh ya ki 10 ngut kiwa chong chnong kiwa sakhi ya itai i jia.
Hawa thooh bniah hajrong itai i jia, da yohlaad wow yachem wa ki bru ha Pynursla Police Station, wei hawa yaklam wa kini ki bru da pynsñiaw ki wa ym em iwon iwon i thmu wow pynyap ya katai ka dngiem, tangwa da chem ya kani ka mrad wa da yap chwa ha i thaw ieñ wada pynyang yow lait nei chah tympra ka ksiñ ngap wei kawa da sma tung.
Hawa kylli ya i daw wa booh ki ya i thaw ieñ ha katai ka khloo, da pyntip wa boonsien jooh maad ki yei chah pynjæd chah tympra ki mar rep, kam ki soh wa kiwi kiwi, khamtam ki ksiñ ngap wa ri ki khnang wow yoh kamai. Da pyntip wa ya kani ka dngiem da chem na i thaw ri ngap kawa da chna kam ka krem kawa em chiboon ki ksiñ ngap, wei ha ini i thaw ri ngap toh i yong u Sahlang Khongiang wa ka Synsharhun Khongthaw.
Da pynsñiaw ki leh yei sñiaw dooh nong hadien i kreh chitom, boonsien chem ki wa ki ksiñ ngap da chah tympra ke ki wei ini i daw wa booh ki yei thaw ieñ, da pyntip ki leh wa ya kani ka dngiem da chem ha ka 4 tarik uni u bnai ha i por 4 waje janmiet wei da antaad wa kani ka dngiem da yap chwa ko kamwa 2 sngi neibhah da sma tung ko wei neiliang yong ki da thang noh ki syndon ya katai ka dngiem ha itai i jooh hi i thaw.
Hawa kylli lada tip ki wa man pyrchah yaka aiñ wow pynyap ya ki mrad khloo heiwa ye u chah pynchitom leh katkam ki kyndon aiñ, da ong wym tip ki iyi iyi leh neibhah wa ym jooh em wa lai pynche neiliang ka sorkar næ ka chnat hawa yatoh wa ini i bynta.
Discussion about this post