Ynne ka miet u montri rangbahdooh ka ri, u Narendra Modi hawa klam ya ki paidbah ka ri heiyatoh wa i yakhun ya ka khlam u COVID-19 da pynbna u ya ka laad yarap (Package) kawa da tip kam ka Atmanirbhar Bharat Ahiyaan.
Da kdaw u wa kani ka Package da kynthup lang ko ya ki rai ka sorkar chwa ynne ka sngi heiyatoh wa i yakhun ya ka khlam u COVID-19 deiwa ong leh wa kani ka rai da chimlang wa ka RBI, wei da kynjoh ko T. 20 lakh klur kawa yaryngkat wa ka 10% ka GDP ka India.
Da pynrap u leh wa kani ka Package daw yarap ko ya ki warep, kiwa khih mylla, ki karkhana khian (Cottage Industry), ki MSMEs, ki manyung mansem, wa kiwi kiwi wei ya ka yutip bniah hajrong kani ka Package daw pynbna da ka Finance Minister ha kini ki sngi wow wan.
U Modi da ong u leh wa i pynkylla yei rukom krehkaam (Reforms) ha kini ki 6 snem wa dadep kiwa da pynman ya ka ri wow chaniah ko pyn daka yaka hi wei mynried leh u man ko kawa da khreh.
Da kdaw u ya i rukom pynkylla ya ki rukom krehkaam nadooh i pynpoi ya ki mar (Supply Chain) neibynta i kaam rep, i rukom kheiñ dan, ki aiñ wa ye u pdiang wei kiwa krehkaam, wa kiwi kiwi kiwa da yarap wow poi cha ka thong yong ka Make in India.
Da pynksan u leh wa kani ka Package daw ebor wei kyrchaan ko ya kiwa dooh, kiwa khih mylla wa kiwi kiwi.
Heijooh i por da pynkynmoo u leh wa kam ha kini ki por i emkaam ki paidbah ka ri da ye u pyndap pyn deiwa da em chwa hapoh ka ri wei kattu wow yarap pynkhlan ya ki.
Discussion about this post