Ynne ka sngi, ki paidbah ka East Jaiñtia Hills da mih yonglang ki ha Lad Jalyiah wow pyrchah ya i pteiñ ka sorkar wow chah wow wanrah ya u mooyong na Assam cha ki karkhana pynmih khyndaw-bilat wa em hapoh ka District.
Ha ini i mih paidbah da emlang ki seiñ kam ka Jaiñtia Amalgamated Redressal Forum (JARF), ka Synjuk Waheh Chnong ka East Jaiñtia, ka EJCSA, JCMDA, MPLU, EJNC, HNYF-EJC, HANM, KSU, JSU, JSM, JYF, SBYWA, RJYM wa kiwi kiwi kamjooh leh ki kattu katni ngut kiwa chong chnong ka District.
Heipor wa yalang paidbah kini ki seiñ da wan ki heh ki District kam u DC, ki Magistrate wa ki heh pulit nadooh u SP wa kiwi kiwi wow klam sñiawthooh wei wow sangeh i yakhih neibhah wa da em ki kyndon ka aiñ wow khang yeini.
Hadien ini kiwa kitkaam kini kiwa chimbynta ha ini i yakhih da liwan ki wei da chong pyrkhat ki hajrong ini i kaam.
Hadien ka yalang hawa yaklam wa u Helping Phawa uwa man u Chairman ka JARF, da ong u wa ha ka yalang da chim ya ka rai wow epor ya ka sorkar wow pyndam yei wanrah ya u mooyong na baar ka District hapoh ka 16 tarik uni u bnai.
Da pynrap u leh deiwa ong wa lada ka sorkar ym mano ko yeini deiwa pyndam yei wanrah mooyong na baar jylla, nadooh ka 17 tarik won daw sangeh ki wow krehlang wa ka sorkar.
U Helping da pyntip u leh wa ki Dorbar Chnong wa ki seiñ da krehlang ki wa ki bor ka sorkar neipor cheipor deiwa e nongmuna wa ha kini ki por da thung wei da kreh ki kam ki VDP heiyatoh wa ka yakhun pyrchah ya ka khlam u COVID-19, wei da man ki leh kiwa smat wow booh ya ki thaw sah namo ki Quarantine Facility ha ki jar jiar ki chnong wa kiwi kiwi.
Da ong u wa nadooh ka 17 tarik lada ka sorkar ym mano namo ym pyndam ko u wanrah ya u mooyong, daw sangeh lut ki wow krehkaam wa ka sorkar khamtam wa ki bor District.
Discussion about this post