Uwi u bru paidbah da chah sait yap u wa kiwi da mynsoo ki hadien wa siat suloi ki chipai ka Indian Army ha chnong Pumao, Longing District ha Arunachal Pradesh ynnin ka sngi.
Ya uwa khlaad da tip kam u Lamdaan Lukham (60 snem).
Ini waroh da jia i heipor wa pynman yaka yalang ha iwi i yung wa em ha chnong Pumao haprydi u waheh chnong, kiwa chong chnong wa kiwa mihkhmat ka Indian Army yow yaklam yeiwa jia chi sngi chwa.
Ki chipai haka 15 tarik da kem ki ya uwi u khynroo kani ka chnong yow takit ya oo heiyatoh wa ki seiñ kieñ suloi. Heiwa uni u khynroo da chah dat u heipor wa chah takit u, kamtæ da pynman ya kani ka yalang.
Kani ka yalang ym em lai bait ko wei da poi chei cha kawang moo ki chipai kiwa da siat kylla yaki paidbah heiwa uwi da toh kuli u ha kjat wa ha khlieh katwa uwi won ha kjat. Da em leh ki chipai wa da mynsoo na ini i jia.
Neiliang ka Indian Army won da ong ko wa da hap ko wow siat yow yada neibhah wa yoh yutip ko wa em i lai i wan ki dkhot ka NSCN (IM) hapoh kani ka District.
Da ong leh wa ha kani ka yalang ha ka chnong Pumao, ki chipai leh da sdang ko wow thooh hapoh ka chnong hadien wa yoo wei suba ki wa em iwa rap phær wei da lai ki cheiliang iwi i yung heiwa da em wa siat ki, da ong u Defence PRO Lt Col P Khongsai.
Kamtæ da phah yaki paidbah wow yut ki yow lait ki nei maa wei neiliang ki chipai da siat ki 8 kuli tangwa heini i kulmar kiwa suba toh ki dkhot ka seiñ kieñ suloi da yoh ki wow yut wei da mynsoo kiwa chong chnong wei da khlaad uwi.
U Khongsai da ong u leh wa da mynsoo ki chipai neidaw wa chah kawang moo ki ha kiwa kyrchaan yaka NSCN (IM), wei da phah u leh yaka khubor sñiawlem cha uwa ha yung uwa khlaad.
Ki bor District leh da pynbna ki wow e T. 50000 cha kiwa hayung uwa khlaad wa T. 20000 cha kiwa mynsoo.
Neiliang ka North East Student’s Organization (NESO) da beiñ joor ko ya ini i chah siat yap uni u bru paidbah kamjooh i mynsoo kiwa boon heiwa ini i leh ka Indian Army da man i bak la bak yeiwa kam ki toh kiwa bait wa ryntih dooh hapoh pyrthai.
Neiliang ka KSU leh da beiñ joor ko ya ini wa jia wei dawa ko wow pynchitom ya ki chipai wa emkti.
Ka Wancho Students’ Union (WSU) leh da dawa ko wow pynchitom ya kiwa emkti deiwa ong wa ini ym toh iwa thymme nadooh wa krehkaam ka Armed Forces Special Powers Act (AFSPA) hapoh ka District ha u 1958. Heiwa ki chipai jooh psiah yabor ki cha yung ki bru hei miet wei da pynchitom ki yaki khynroo wa rah ki boon sngi deiwa rah yaki cha ki Camp ki chipai.
Neiliang ka North East Humans Right Organization (NEHRO) leh da booh ko ar tylli ki ujor waka National Human Right Commission (NHRC) pyrchah yaka Indian Army.
Da ong ki wa uwa chah rah toh heipor wa liwan u na yungmane heipor 8 waje i miet wei da dat da bom ha oo wei da chah u liwan u manda poi pyrdi synyaw, da ong ka NEHRO haka ujor yong ka.
Discussion about this post