Ka seiñ Federation of Khasi Jaintia & Garo People(FKJGP) East Jaiñtia Hills District da pynsñiaw ko yei sñiawdiaw wa khroo heiyatoh wa slem ka sorkar Meghalaya lyngba ka chnat i chait i khiah wow wai ya ka Sub Centre wa em ha chnong Kuliang kawa e yei chakri ya ki paidbah wa chong chnong kam ka chnong Kuliang, Borsara, Lejri wa Pyrtakuna.
Katkam i khana yong u waheh chnong ka Kuliang, u M. Lamare ha uwa yahkhmat ka seiñ u MC Suting, da ong u wa kani ka Sub Centre da sdang chna ya ka nadooh u snem 2013 wei da pyndep ya ka ha u snem 2015 heiwa kani ka Sub Centre toh kawa emkaam bha u wai ya ka khnang wow ye ko u e yei chakri wa rap bha ya ki chnong wa em ha ki thaaiñ khappood wa ka ri Bangladesh neibhah wa jngai ya ki paidbah wow lai thooh dawai chadooh Umkiang PHC.
Kamtæ neiliang ka seiñ da lai yachem kyrpang ko wa u Dr. D. Shylla, District Medical Health Officer (DMHO) yong ka East Jaiñtia Hills District, wow kyrpaad ya ka sorkar yow wai ko ya kani ka Sub Centre khnang wow man ko i kyrkhu ya ki paidbah heiliang i nang i chait.
Neiliang u DMHO da ong u wa oo chimkhia u wow pyntip cha ki bor wa hajrong heiyatoh wa ini i angnood yong ki paidbah, pynkut ka kyrwoh khubor wa phah da u D.H. Sumer, General Secretary yong ka seiñ.
