U montri rangbah ka jylla, u Conrad K Sangma, ynne da chimbynta u ha ka State Talent Identification 2022 ha St Anthony’s Higher Secondary School ya kawa da pynman da ka Meghalaya State Olympic Association chirup wa ka Department of Sports and Youth Affairs, wei ya kawa da pynkrehkaam da ka EDGE10 Group.
U Conrad K Sangma, hawa e yei klam da ong u wa emkaam wow chem ya ki bru wa em sap ha ki yalehke sports nadooh wa dang khynnah khnang wow ye u pynjanai ya ka sap yong ki.
Da ong u wa ka sorkar emkaam wow thooh ki laad ki luti khnang wow ye u pynwandur ya ki khynnah khnang wow ye ki u rahnaam ha ki jait yalehke wa em sap ki.
Chooh chooh da pyntip u wa ka sorkar angnood ko wow sdang ko wow thooh ya kiwa em sap namo ka Talents Identification ha ka jylla ha kiwa boon ki bynta nadooh i sur (Music), i stat ka juk wa katni (Science and Technology) wa kiwi kiwi.
Ya kani ka State Talent Identification Programme da chimbynta da u Commissioner, Sports & Youth Affairs, u Dr. Vijay Kumar wa ki dkhot ka Meghalaya State Olympic Association.
