Shillong: Ka yung ka sem yong u montri ka sorkar jylla, u Kyrmen Shylla da angnood ko wow chimkti ya i khonboo kynthai wa da chem ha pchem yung yong uni u montri ha Nongrim Hills, Shillong ha i step ka 30 tarik heipor 6:30.
Hawa yaklam wa u Kyrmen ynne ka sngi da ong u wa i wan poi ini i khonboo ha yung yong ki man i i kyrkhu ya ka yung waroh kawi.
Da ong u wa ka bei, ki payu wot hadooh u pa u yong oo leh kwah bha ki wow chimkti ya ini i khonboo tangwa haap yang ki kamjooh leh haap lai ki katkam ki kyndon yong ka aiñ.
Chooh chooh da ong u wa ki kyndon wa ki luti man ki kiwa jrong wei angnood wei thrang u wow yoh u chimkti wow ri noh ya ini i khonboo wei ini waroh chong i ha i mon yong u Blai.
U Kyrmen leh da ong u wa lada ka yung yong oo ymyoh ko u chimkti ya ini i khonboo, tangwa yooluti ko wa ini i khonboo u poi i ha ki kti wa ki manyung wa bha ki wow ri wow sumaar hok ya ka.
Katkam wa man hi ini i khonboo toh iwa la 2 bnai wei hadien wa chem ya ini i khonboo da pyntip cha ki pulit wei da yah cha Hospital wei hadien wa sylli yei chait i khiah ini i khonboo da ekti noh cha ka Lawei Ba Phyrnai Adoption Agency.
Neiliang ka District Child Protection Unit da epor ko 2 bnai ya kiwon iwon kiwa tip næ tipmit ya ini i khonboo wow wan chakhmat wow kam ki, wei lada ym em wa wan kam hapoh 2 bnai, ya ini i khonboo u ekti noh cha kiwi wow sumaar.
Discussion about this post