Ynne ka sngi u President ka Seiñraij Jowai, u OR Challam hawa yaklam wa kiwa pathai khubor da pyntip u wa ka Executive Committee ka raij da chong yalang ko ha ka 15 tarik uni u bnai heiwa da phyllu yumut ko heiyatoh wa i chah ktah ki paidbah ha i wan wa ar ka la’ær khlam COVID-19.
Da pyntip u wa ha ka yalang da rai wow maap ya ka bai wai neibynta yong ki dukan dukdoh ha ki dukan ka Seiñraij Jowai neibynta u Naisan wa Naiynru uni u bnai.
Chooh chooh da pyntip u wa ya ka dan næ ka bai khyndaw wa khrong na kiwa chongdai wa ya kiwa khrong dan daw pynyinsur (Extend) ya ka ar bnai wei daw maap ya ka ar bnai heipor wa pynthymme ya ki kot ki sla.
Da pyntip u leh wa ki tre dukan wa kiwa chongdai ha dukan dukdoh wa ki yaw ka Seiñraij daw emkaam wow chim ki ya ki tika yada COVID-19 wei ya kiwa ympu em u chim ya ini i tika da pynyinsur ya i por wow chim ki ya ini i tika deiwa lai ki cha ki thaw wa da booh ka sorkar.
Heiyatoh wa em ki bru kiwa artatien wow chim ya i tika, u Challam da ong u ya i daw wa ym chim ki ya i tika emkaam wow yaklam ki wa ki Doctor wa kamjooh wa ka sorkar wow pynche ya i daw wymye ki u chim ya ini i tika.
Heijooh i por da ong u leh wa emkaam ya kiwa chongdai wow bood ki thij ya ki kyndon wa da booh ka sorkar neipor cheipor heiyatoh wa kani ka khlam.
Da maham leh ya kiwa chondai kiwa ymye wow bood ya kini ki kyndon wa da booh ka seiñ wa ka sorkar wa lada ymye ki wow bood kamni ye ki wow thooh dukan noh chawi.
Heiyatoh wa ka bai skur ki khynnah ha ka Seiñraij Secondary School wa ka Seiñraij Higher Secondary School da rai leh wow maap ya ka ar bnai wei wot ya ka Creche wa ka Playschool wa pynlai da ka Women’s Welfare Organisation ka Seiñraij Jowai leh da rai wow maap ya ki ar bnai.
