Ka lehniam Behdieñkhlam ha ki soo sngi le yaw wa daw pynman nadooh ka Pynsiñ ka 8 hadooh ka 11 Naiynñiaw yong ka Raij Jowai kamwa man ha u snem wa dadep, da hap pynkhreh ya ka deiwa bood ya ki kyndon kiwa khang yei poor wei wow yada na ka khlam kjut COVID-19.
Ynne ka sngi neiliang u President ka Seiñraij Jowai, u OR Challam da pyntip u wa ka seiñ da chong pyrkhat ko heiyatoh wa ka Behdieñkhlam neibhah wa boon ki niam yong ka Behdieñkhlam toh kiwa da pyndep wei hajrong ini neiliang u DC leh da ebor u wow pynlai bait ya i pynkhreh ya kani ka lehniam.
U Challam da pyntip u wa katkam wa man katni dang pynkhreh ya ki kyndon SOP wei hadien ini daw phah ya kini ki kyndon cha ka sorkar.
Chooh chooh da pyntip u wa kani ka lehniam ha uni u snem u man ko leh hajrong i dap 50 snem ka jylla wei daw pynman ya ka chirup wa i krehlang wa ka chnat Arts and Culture ka sorkar jylla.
Da pyntip u leh wa neiliang ka sorkar India lyngba ka NEC wa ka Ministry of Culture da tyrwa ko ya ka Seiñraij wow krehlang wa ka kamjooh wa ka NEC kam ka dak i lehwarom ya i dap 75 snem ka ri India.
U Challam da pyntip u leh wa neiliang ka Seiñ daw chong pyrkhat biang ya ini waroh heiyatoh wa ka Behdieñkhlam yong uni u snem kammon u man ko, la kawa heh wa kmai namo kawa khian.
Da pyntip u leh wa neiliang ka seiñ daw lai Chwar ki wow pynap pynsñiaw ha ki Blai khnang wow ye u pyndep ya ka niam wow beh ya ka khlam na Jowai kamjooh leh na ka pyrthai.
