Deiwa pait yeiwa lehbha ki ar ngut kiwa yalehke Karate namo ki Karateka ka Meghalaya, kitæ u Gideon Tympuin wa u Daniel Dabiangbha Warjri, da chah jied ki wow mihkhmat ya ka India ha ka 10th Cadet, Junior, U-21 and Senior South Asian Karate Championship 2026 wa pynman ha Bangladesh.
U Gideon daw chimbynta u ha ka Men’s U-21 Individual Kata Event katwa u Daniel won ha ka Boys’ Junior Individual Kumite (-68kg).
Kani ka Championship toh kawa pynman ha Dhaka nadooh ka 15 hadooh ka 19 tarik uni u bnai.
U Gideon dadep yoh Gold Medal u ya ka Meghalaya ha ka 5th KIO Senior & U-21 National Karate Championship 2026 ha New Delhi wa pynman ha u February-March, katwa u Daniel da yoh Silver Medal u ha ka Individual Kumite Junior -68kg Category ka 5th KIO Sub-Junior, Cadet & Junior National Karate Championship 2026 wa pynman ha Dehradun ha u bnai June.
Neiliang ka All Meghalaya Karate-Do Association (AMKA) da pynman ko ya ka yalang khian yow pyn-eh-daw ya kini ki ar ngut ki deiwa e leh ki tiar ki tar yow yarap ya ki yow yoh ki leh yei jop ha Dhaka wei yow man ka lai ka wan kawa suk.
Discussion about this post