Na ki 4 ngut ki chynrang napoh ka jylla Meghalaya, ar ngut na West Jaiñtia Hills kitæ u Pynioladmi Pala na ka chnong Ummulong wa u Daman I Mahrhen Pohktai na ka chnong Sohkha Model, deilang wa u Akash Choudhary wa u Pritam Sunar kiwa na Shillong, da man ki kiwa da chah jied u lai chimbynta hei yakob pynyoo dohksah wa tip kam ka 12th Mr & Ms India National Bodybuilding Championship wa pynlai da ka World Fitness Federation kawa man leh kawa heh dooh hapoh ka ri kawa daw pynman ha u Khongchonglad (Nov) nadooh ka 8 hadooh 10 tarik hapoh ka sor Chennai.
I chah jied kini ki 4 ngut toh hadien wa jop ki ha ka Mr. Meghalaya kawa dang dep man wot haka 5 tarik uni u bnai kamjooh leh haka yakhun Mr. East India kawa man ha Shillong ha katai hi kajooh ka sngi.
Kini ki 4 ngut toh kiwa haap hapoh i sikai u Dr. B. Desire Kynjiñ kam u Trainer wa u Baniaiphira Manik Syiem kam u Master Trainer.
U Pynioladmi Pala, daw chimbynta u haka yakob Men’s Physique Short Class, u Daman I Mahrhen Pohktai haka Denim Jeans Class, u Akash Choudhary haka Men’s Physique Tall Class katwa u Pritam Sunar ha ka Body Building Class.
Neiliang u Baniaiphira Manik Syiem kam u Master Trainer hawa klam, da pynsñiaw u yei kmen wa lyngba i kohngooh wei bood ryntih kini ki khynroo yei sikai wa da pynyoo pynkdaw u tæ poi ki cha kani ka kyrdan.
Neitæ kam uwa sikai ong u wa jooh pynchlur bha u ya ki khynnah wym toh u kut ki du hei lehke hapoh Gym tangwa u mih yakhun leh haki rynsan yakob waphær waphær.
“Kani ka Sport pynwandur ko yei doh i pran kamjooh ki dohksah wei man ko kawa eh wei jynjar bha neibhah nyngkong dooh toh i baam, wei hap wow thaw thij pa thij yei baam wei kiwa kammon jait hap u baam, kamwa 70% toh nei baam, 20% won kammon u pynwandur ya ki dohksah hapoh Gym, 10% won toh u biang i thiah i dem,” da ong u Baniaiphira Manik Syiem.
Kamtæ pyn-eh-daw u ya waroh kini ki wow lai chimbynta yow lehbha ki khnang yow wanrah naam ki yaka yung ka sem, ka chnong ka thaw, ka District waka jylla hi waroh kawi.
Neiliang kini ki 4 ngut kiwa daw lai chimbynta leh da khana ki yei lai luti yong ki heiyatoh wow pynwandur ya ki dohksah. Kamjooh da khana ki yei pynkhreh wow lai yakhun ha ka Mr. India National Bodybuilding Championship hanla em hapyrdi i eh i khoo.
Kyntu kyrpaad ki leh ya ki paidbah wow e mynsien wei kyrchaan ki ya ki khnang wow liwan ki cha ka jylla ka chnong ka thaw deiwa rahlang ki khusnaam.
Napyrdi kini ki 4 ngut ki chynrang wow mihkhmat yaka jylla, ka Larisa Z Syiem kawa jop haka Sport Model Glamour Class leh daw mihkhmat ko yaka jylla cha katai ka lympung.
Discussion about this post