Uwi u bru wa lai luti da ka lieñsuiñ ka IndiGo na Bengaluru cha Varanasi da mut u wow wai ya ka dwar Emergency Exit Door ar sien heiwa chisien toh chwa wow hiar.
Ya uni u bru da kem wei da kam u toh wa yoh ksuid u heipor wa leh u yeiwa leh u.
Kani ka lieñsuiñ da mih ko na Bengaluru heipor 8:15 i miet wei uni u bru toh uwa tip kam u Mohammad Adnan uwa chong chnong ka Mau District ka Uttar Pradesh heiwa nyngkong da khura u ya ka dwar du hadien 15 minit wa hær heiwa da ksoh noh oo.
Da pynche u wa toh leh bakla u wei ym leh de u yeini heiwa da chong u kiaw.
Tangwa manda kieh 10:20 i miet heipor wa pynkhreh wow hiar noh kani ka lieñsuiñ ha Lal Bahadur Shastri International Airport ha Varanasi wei ka lieñsuiñ da em ko kamwa 500ft na khyndaw, uni u bru da pyrchang biang u wow wai ya ka kani ka jooh ka dwar.
Neiliang ki Cabin Crew da pyntip ki wut-wut cha u Pilot uwa da dam chwa wow pynhiar ya ka lieñsuiñ deiwa pynskit biang ka sa chisien cha suiñ wei da yoh wow hiar deiwa suk heipor 10:35 i miet.
Ya uni u bru da e kti cha ki bru ka Central Industrial Security Force kiwa da pyntip cha ki pulit kiwa da wan wow chimkti ya uni u bru uwa da ong wa da leh u yeini neidaw wa yoh ksuid u.
Da khana u leh wa dang wan chuti u na Goa wei ym em tip yongbru u heipor wa mut u wow wai ya ka dwar.
Discussion about this post