Hei miet ka 23 tarik, 9 ngut ki bru wa kynthup ya ki khynthai da yap ki hadien wa iñ ka Sleeper Tourist Bus ha Yamuna Expressway ha Greater Noida.
Ini da jia i heipor wa kiwa boon wa chong ha ka Bus dang yohthiah ki wei kat u khyrngiat ki da dap tdem ka Bus.
Kani ka Bus toh kawa lai na Noida cha Mahoba, Uttar Pradesh wei da kit ko ya 30 ngut ki bru.
Neiliang ki bru ka Fire Brigade da wan ki ha i thaw wow tymplæh yei diñ katwa ki pulit na Jewar Police Station da poi ki ha i thaw wow yarap ya kiwa chah ktah kamjooh wow takit yei daw wa sdang i diñ.
Katkam ka FIR wa da booh pyrchah ya uwa yah Bus wa u Conductor, da ong wa kini ki ar ngut ym em ap ki yeiwa ong kiwa chong Bus wa em i sma wei da pteiñ ki wow dih biri sikret hapoh ka thaw wa chong namo ka Cabin wa em uwa yah Bus.
Hadien ini da kop diñ najan ka thaw chong uwa yah Bus tangwa uwa yah ym bien u wow sangeh wot hawa ki bru da kyrpaad ki wow sangeh u wei kat u sangeh u da dap tdem ka Bus wei da kulmar nei yaknieh ki bru wow mih cha lait heiwa da em kiwa tympiah ya ki yit deiwa pynemkaam da ki Fire Extinguisher.
Ki pulit da kem ki ya uwa yah Bus deilang u Conductor wei neiliang ka yung krehkaam u PM da pynbna ko ya ka poisa yarap wa Rs. 2 lak cha ka yung ka sem kiwa yap wa Rs. 50,000 cha kiwa mynsoo.
Ha iwi won iwa da jia ynne ka sngi, sa kawi ka Bus da iñ syndet ko ha u sarok Mumbai-Pune Expressway tangwa da embhah wa ha ini wa jia ym em wa mynsoo heiwa kiwa em hapoh da yoh ki wow yut.
Kani ka Bus da baam lut i diñ ka hanla da wan ki bru wa tympleh diñ.
Discussion about this post