Jowai : Nadooh ka sorkar bei hadooh ka sorkar jylla pynksan ki yeiwa emkaam u man i kiwa lehkhooid ya ki chnong ki thaw ki luti syngkieñ wei da pynkrehkaam leh da kiwa boon ki scheme yow poi cha kani ka thong i khooid i jngiar.
Tangwa ha kani ka kynti wat hadien wada sdang biang kiwa kreh ka Jowai Municipal Board u likit likhat yaki jhep na ki dong waphær waphær ka chnong Jowai, ha kini ki sngi da yoh u sakhi yei jhep wa lang ha kiwa boon bynta ki sarok ha kylleiñ ka chnong Jowai.
Yeini da yoh u sakhi yei jhep wa em ha Khammujat, Tpep Pale ha u sarok wamih na Ummuiang cha u sarok Thomas Jones Synod College, heiwa ki jhep da man ki kiwa dang lang kat dang lai ki sngi.
Ha u sarok Dulong College Road iwa da em leh ka signboard wada mana wa ym hoi u noh khyndaw noh jhep ha ini i thaw, tangwa kani ka signboard leh man ko kawa yieñ hieh khlem myntoi.
Ha Ummutong, u sarok wa lai na Loomiongkjam cha Aitnar ki bru dang pteiñ ki u noh jhep heini, wei da yoo leh yaki tin wada hooh kær wow khanglaad yaki bru u nohjhep heini da man ki kiwa da lait da haap.
Ha u sarok wow lai na Panaliar hawchwa wow poi ka Civil Hospital Jowai, ha i thaw wa tip kam i Dieñjri, ki paidbah dang nohjhep hiki heini.
Kini ki thaw kiwa noh jhep ki bru man ki leh kiwa em ki liar ki chka kiwa kai sak cha ka wah Myntdu, ka wah wa khut maya i ka Tawiar Takan kawa da wa kær ya i.
Katkam ka yutip wa yoh da ong wa ki dong ki chnat wa em kini ki thaw dei langær chong pyrkhat ki yeini i rukom nohjhep khlem akor ki bru ha kini ki thaw, tangwa ympu yoo yaki dak ki chin hadooh katni wada ye u khang yeini.
Lada kamni man i wow nohjhep ha kini ki thaw yi myntoi u yooluti i wow kreh wow pyrkhat neibynta yow yada yaka wah Myntdu yong i kawa pyndap ya i ka um u baam u dih, u rep u riang wei kawa jooh ka-it bha i u lai uiñke lai baamdoh chaka?
Discussion about this post