Ka Hynniewtrep Youth Council (HYC) ynne ka sngi da pynbaad ko wa ka Notice Inviting Quotation (NIQ) wa da pynmih da ka Directorate of Housing ha ka 10 tarik u Naisaphra 2024, da pynyoo yei leh wym hok wei pyrchang wow e myntoi du ya ki kattu katni ki Company næ kiwa chna Tin ha Meghalaya.
Ini da wan ko hadien wa ka chnat Directorate of Housing ka sorkar jylla da pynmih ko ya ka NIQ yow pynpoi ya ki Tin sap yung namo ki Aluminium Roofing Sheet cha ka chnat iwa chongdor hadooh Rs. 69,65,00,000.
Hawa klam cha kiwa thoh khubor, u President ka HYC, u Roykupar Synrem da ong u wa ki kyndon wa da booh da ka NIQ toh kiwa da chna ha itæ i rukom wa pynsñiaw wa ka chnat da e kabu ko ya ki bru kiwa emyatoh wa yajan wa kiwa synchaar khadar.
Ki kyndon kyllum ha ka NIQ da ong ko wa du kiwa seiñ khih dei yong ki hi (Entrepreneur), kiwa mihkhmat ya ki karkhana kiwa em ya ki thaw wow pynmih yei mar næ ki karkhana ha ka jylla kiwa ye u chimbynta ha ka yathong, wei ymphær lada kini kiwa seiñ kreh man ki kiwa biang hawa pymih ya ki mar næ kaam chalan, da ong u President ka HYC.
Najrong ini, u Roykupar da ong u wa ha ka Technical Bid leh, ki kyndon yei em poisa kiwa thong ym man ko ha itæ i rukom wow e myntoi ya u/ka bru deiwa booh ya ka kyndon wa yoh kamai wa chi snem (Annual Turnover) ka wow man du Rs. 1 klur katwa ha ka NIQ yong ka 11 tarik u Thohlakhmi (Feb) 2022 neibynta ka Contract kawa chongdor Rs. 20,00,000,00 da emkaam i yoh kamai kawa chi snem ka wym toh u duna ya ka Rs. 10 klur neibynta wow yoh chimbynta ha ka yathong yei kaam.
“Kini ki kyndon ha ka NIQ da pynsñiaw artatien ko hajrong i rukom che ka rukom pynlai yei thied ya kini ki Tin sap yung wei ye ko wow man i pyrchang na ki bor wa pait yow rieh hadien kini ki kyndon du wow e myntoi ya ki Company næ kiwa seiñ khih wa em yatoh yow yoh ya ka Contract,” da ong u.
Discussion about this post