Ka KSU Nartiang Circle da ong ko wa ym em de ka roi ka paar ha ki thaaiñ palatsor neibhah wa ki VEC yong ki chnong waphær waphær da artatien ki wow pynkrehkaam ya Scheme MG-NREGA namo ka kreh 100 sngi neidaw wym pynlait poisa ka sorkar kamjooh ym pynlait ya ki tiar ki tar da ka sorkar da 3-4 snem heiwa kani ka Scheme nachwa toh kawa ym em de kam ka kawa wanrah yei roi i paar khlem sangeh hadooh ym em de ki MDC Scheme, ki MLA Scheme hakhmat kani ka kreh mylla 100 sngi.
Ka seiñ da ong ko wa katni won du wow kynmoo leh ym kwah de neibhah wa da ban ka ram ha ki tre dukan Hardware, heiwa nachwa du hawa paan yei tiar hei pyrtuid yong ka 100 sngi. wut-wut ki tre dukan da e ki tangwa katni won da ong ki wow pyndep chwa u su ya i warim.
Kamtæ da ong wa neiwon u yoh yei roi i paar khamtam cha ki thaaiñ palatsor, “Hao ka bai mylla sngi tooid ko khlem sangeh marsien dep, iwa kthah won toh ki tiar ki tar khamtam ya ki chnong wym em poisa da ka yong ki hi kiwa da hap wow chim ram nadooh wow thied khyndaw bilat, ki rot, ki moo wa kiwi kiwi wa emkaam wow pynbiang wei hadooh kiwa jooh yarap e ram leh da kynran dien ki neidaw wa slem ka sorkar wow pynlait poisa.”
Ka seiñ da kylli ko leh ya ka sorkar wa katni wa ileh ha ki por wa nachwa marsien pynlait poisa naka sorkar bei, wut-wut da lait ym du ka nong sngi wot ka poisa yow thied ya ki tiar ki tar?
Lada ka sorkar wa katni leh ko kamni ym em kyrmen de ya kani ka MGNREGA kawa da man kamwa yang Bill PWD, kamtæ da kylli ya u Montri wa pait ya ki C&RD Block lada ym kwah de wow yoh myntoi ki paidbah wei toh u e jubab u hajrong ini.
