Ka Super League ka Amlarem Sub-Divisional Sports Association (ASSA) da pteiñ biang ya ka ynne sngi ha madan Mini Stadium Ladjaplem heiwa da pynman yaka yakhun Semi Final.
Ka yalehke wa da pynman toh hapyrdi ka Man I Bha waka Pdengkarong YC wa jop da ka Man I Bha da 2-1.
Ka Man I Bha da yoh ko wow thap kool nyngkong lyngba u Joshwa Hmar haka minit wa 11 kawa da neh hadooh wa kut ka kylla ste. Mar ya sdang ka kylla miet, ka Pdengkarong da su ko chi kool lyngba u Akordor Lamat haka minit wa 51 tangwa ka Man I Bha da ye ko wow pyntam biang haka minit wa 72 lyngba u Tei Tariang.
Da ini i jop ka Man I Bha da yoh ko wow psiah Final katwa ka Pdengkarong dang yoh laad ko sa chisien heiwa daw yachem ko waka Thangbuli haka 3 tarik heipor wa 2 waje.
Ki yalehke won yong ka Lower Division da dang yaka Round 16 ynne yow yaknieh psiah Quarter Final heiwa ka Khonglah Amsohthai da jop ko yaka Nongtalang Mission da 1-0 da ka kool wa thap u Jacob Lamin haka minit wa 2.
Da pynbood saka Shnongpdeng SC waka Tra Ki Mawngap kawa da kut da 0-0 heiwa ha ka yachut Tie-Breaker da jop da ka Shnongpdeng da 10-9.
Ki yalehke mynstep u pynman soo tylli kiwa daw sdang da ka Muktapur waka Dongwah Thangbuli heipor 10:00 waje i step, ka T.C. Pdengshakap waka Nongshiliang heipor 11:30 i step, ka Jaralod SC waka Sapator United heipor 1:00 waje i sngi wei daw pynkut daka Syndai Kmaishnong waka L. Amshipai heipor 2:30 i sngi.
