Shillong: Khad ar ngut ki MLA na ki san tylli ki party hapoh ka lama ka Meghalaya Democratic Alliance (MDA) da baam smai ki ynne ka sngi kam ki montri sorkar wei ya kini da pynbaam smai da u Lat ka Jylla u Ganga Prasad ha Raj Bhavan, Shillong.
U Conrad K Sangma da baam smai u kam u Montri Rangbah ka Jylla uwa khad ar yong ka jylla, nalor u Prestone Tynsong, u Sniawbhalang Dhar, u Coming Ymbon, u James K Sangma kiwa na ka NPP.
Na UDP kiwa baam smai kam ki montri toh u Metbah Lyngdoh, u Lahkmen Rymbui wa u Kyrmen Shylla katwa na BJP da baam smai da u AL Hek, naka HSPDP da baam smai da u Samlin Malngiang wei na ka PDF da baam smai da u Hamletson Dohling wa u Banteidor Lyngdoh.
Ka yalang pynbam smai man ko kawa rap pher neibhah da wan sakhi da ki Montri Rangbah na kylleiñ ja jylla thaiñ mihsngi.
Ha kani ka yalang pynbam smai ya ki montri, da wan synran lang ki heh ka BJP na Delhi wa kynthup ya u Montri kam pohyung ka ri u Rajnath Singh, u president ka BJP u Amit Shah, u Himanta Biswa Sarma, u Montri Rangbah ka Arunachal Pradesh u Pema Khandu, u Montri Rangbah ka Assam u Sarbananda Sonowal, u Montri Rangbah ka Nagaland u Neiphu Rio, u Montri Rangbah ka Manipur u Biren Singh, u Montri Rangbah warim ka Mizoram u Zoram Thanga, nalor ki Montri Rangbah warim ka jylla Meghalaya u Dr. Mukul Sangma, u DD Lapang wa kiwi kiwi de.
Da i baam smai u Conrad, da wanrah ko i kut ya i synchaar ka Congress kawa phra snem ha kani ka jylla hapoh i yahkhmat u Dr. Mukul Sangma.
Ka dhab ka MDA toh kawa em 34 ngut ki MLA ha ka yung dorbar kawa 60 ngut.
Discussion about this post