Jowai: Neiliang ka CoMSO da pynsñiaw ko wa ka jylla Meghalaya da dawa ko ya ka ILP da slem bha, wei itæ toh nadooh u snem 1973 da em ki MLA kiwa rah da ka Resolution wow pynkrehkaam ya ka ILP.
Ka High Level Committee on Influx kawa da khlieh da u Bindo M Lanong (Dy. Chief Minister) ha u snem 2012 da e yumut ko wow pynkrehkaam ya ka ILP ha waroh kawi ka jylla Meghalaya kawa da man i angnood wa i hok ki tre jylla.
Ka CoMSO da ong ko wa ka sorkar pyrdi toh u tip ko yeini wa lada kular ko wow pynkrehkaam ya ka ILP ha Manipur da toh u leh ko kamjooh ha Meghalaya leh. Ki tre jylla ha Manipur em ki ka hok wow yada pynyaki hi nei chah tlep ha ki baar wei ha Meghalaya leh emkaam ya ka jooh ka hok.
“Kamwa tip wa ha ka Sixth Schedule ym em ki kyndon Aiñ wow yada nei psiah kiwa na baar wei du ka ILP wa ye u yada yeini i psiah ki baar ri wa baar jylla. Lada ka sorkar India sñiaw ko wa em i ka Sixth Schedule wei ym kwah ki wow e ya ka ILP ha Meghalaya kwah won i u pynkynmoo wa ha Mizoram ka ILP leh em ko chirup wa ka Sixth Schedule wei da yoo wa ka sorkar pyrdi daw pynkrai ko ya ka Sixth Schedule ha Arunachal Pradesh wa ha Nagaland wa Manipur kamtæ kam ka jylla leh emkaam hok wow yoh ya ka ILP,” da ong ka CoMSO.
Neiliang ka CoMSO da dawa ko na u lat wow pynkrehkaam noh ya ka MRSSA Amendment Ordidance 2019 ka Aiñ wa em ki bor ka ILP.
Chooh chooh da kyntu ko leh ya ka sorkar jylla wymtoh u elaad ya u lat wow leh u katwa ngait wei wow kyntait ya ka rai ka sorkar man ki por lym kamtæ iyi u myntoi wow em ka sorkar wa jied ki paidbah lada ymye ko u pynngait ya u lat.
Discussion about this post