Ka seiñ HANM New Shillong Circle da beh ko ya ki baar jylla kiwa da wan poi ha u pood u ang ka Diengiong New Shillong wa em hajan ka NEIGRHIMS ynne i step heiwa da em ki kamwa 300 ngut.
Ka seiñ da pyntip ko wa kini da wan ki da 3 tylli ki Bus kiwa em Number ka jylla West Bengal, Jharkhand wa Bihar wei ym tip ki neiyi i daw wa poi ki cha kani ka thaw neibhah ym toh kiwa wan phah sumaar.
Ka seiñ da khut ko leh ya ki pulit na Mawdiangdiang Outpost yow lait na iwon iwon i jia wei da beh noh ya kini deiwa maham leh ya ki thaw sah thaw dem kam ki Lodge, ki Hotel wow chah u sah du ya ki bru wa wan phah sumaar donhi kiwa ye u pynsakhait da ki kot ki sla.
Kamtæ ka seiñ da dawa ko naka sorkar wow pynkrehkaam noh da ka ILP yow ye u pait ya kiwa na baar kiwa wan khlem ki kot ki sla wa ki yurim wa biang.
Kiwa boon na kini kiwa chah beh toh kiwa da tymmen heiwa uwi na ki da ong u wa lada em kiwa wan cha ka jylla yong ki, ki da pdiang sñiawbha bait ki ki ya ki.
