Ka Tariang FC da jop ko yaka Umsalait SC da 3-1 haka Final yong ka lympung yalehbol kawa tip kam ka 9th Secondary School Football Knock-out Tournament 2022-23 kawa da pynman ha ka 1 tarik uni u bnai ha madan Pdengshakap.
Ka yakhun khaddooh da man ko kawa yoosuk heiwa ka Tariang FC da yoh ko u pynkhih jaar nyngkong lyngba u Allen Nongbri haka minit wa 12 katwa ya ki ar kool won da yoh u thap da u Knerktilang Buam haka minit wa 73 wa 90.
Ka chi kool won yong ka Umsalait SC da yoh u thap da u Arnes Marwein haka minit wa 75.
Da ini i naam jop, ka Tariang FC da yoh khur ko yaka song poisa kawa T. 2,50,000 katwa ka Umsalait SC da yoh ko T. 1,50,000 deilang wa ki Trophy.
Ya ki khusnaam yong samen da yoh da u Knerktilang Buam kam u Best Player uwa da yoh u thap 2 kool ha kani ka Final, katwa u Frolick Dkhar da yoh u yei naam Best Goalkeeper wei kini pyn-ar toh na ka Tariang FC.
Ya kani ka Final da wan wow pynkut deiwa sakhi da u J. Myrom, DSP East Jaiñtia Hills kam u kongsan, u H. Bareh, Project Manager kam u symbood kongsan deilang wa u K. Passah, DSO West Jaiñtia Hills ryngkat i emlang kiwa kitkaam Sports, ki waheh chnong, secretary chnong wa ki bru paawkhmat yong ka thaaiñ hi waroh kawi.
