Kamwa da yoh u yoo u sakhi wa ka Behdieñkhlam hapoh ka Raij Jowai da sdang ko ynnin ka Pynsiñ 11 tarik heiwa ki khon ka Niamtre da pyndep ki ya ki sarin ka niam jar jiar ki yung ki sem kamjooh ka Khon Raij da pyndep ki yei rong i rah ya ka Symbood Khnong na khloo na kjam.
Ynne won hei step kiwa chakri Niam hapoh ka Raij nadooh u Dolloi, Pator, Langdoh, Sangot, Wasan Waheh wa ki Kñi na ki kur waphær waphær da hiar ki cha Syiem Aitnar neibynta wow pyndep yei e ngooh e dem wei pynkyntang yei man yong ka nadooh kani ka sngi heiwa ka adong niam da ong ko wa nadooh kani ka kynti ymhoi de u em kiwon kiwon kiwa tamkti tamkjat cheidoh i pran yong ka Syiem Aitnar kat hadooh wow poi ka sngi Muchai wow yoohkjat nyngkong hei doh i pran yong ka da ki chakri niam.
Hadien kani ka Kñia ki khon ka Raij da mih ki wow li thooh ya ki Dieñkhlam katwa ki Khonraij won da mih ki wow li thooh ya ka Khnong Blai na khloo na kjam.
Kani ka sngi man ko leh ka sngi wow yachemlang kawa pynyoo yei ya maya kylliang wei i yatylli heiwa chwa wow pteiñ ya ka dieñkhlam, ki khynnah ki waheh na jar jiar ki kur wa ki chnong da ya baam ja lang ki chirup khlem em i sñiawyaphær na u heh na u khian wa uwa yoh uwa dooh.
Hadien wa dep baamja sngi wei da pyndep u pteiñ ya ki Dieñkhlam da rah ya ki Dieñkhlam cha Iawmusiang da jar jiar ki chnong wa kynthup ya ka Tpep Pale, Dulong, Panaliar, Loomiongkjam, Iongpiah, Loomkyrwiang katwa ka Chilliangraij (Khonraij) won da pynpoi ki ya ka Khnong Blai cha Loom Sooiung (Hajan Marian Hills HSS).
Behdieñkhlam ha Ummulong:
Ynne ka sngi kam chibynta yong ka lehniam Behdieñkhlam ka Raij Jowai, ki khon ka Niamtre kiwa chong wa sah ha Ummulong hapoh i pait i yoo ka Seiñraij Ummulong da lai thooh ki ya ka Dieñkhlam yong ki na iwi i khloo.
Ya ka Dieñkhlam da rah won ya ka cha madan Wahseiñkhoh, Ummulong wei mynstep nawon daw rah ya ka Dieñkhlam cha Madan Kuwang, wa em ka Community Hall ka chnong Ummulong heiwa daw pynyieñ ya ka.
