Shillong: Ka dorbar chnong Madanrting deilang wa ka seiñ manbei, ki seiñbhalang wa em ha ka thaaiñ wa kynthup ya ka HNYF, FKJGP wa KSU ynne da beiñ joor ki yaki damok kiwa emkti wow thombor ya ki khynroo ka chnong, hadooh wa uwi na ki da khlaad u wei da mynsoo joor leh ki ar ngut ha ka chnong Pashang katwa dang liwan ki nei baamdoh ha Syntung.
Hawa klam ynne ka sngi wa ki laad pathai khubor, u Secretary ka Seng Samla Shnong, u Roderick Rajee da beiñ joor u ya ini i leh brukhloo yong u paidbhur ha ka janmiet ka 8 tarik deiwa ong wa ym kheiñ de yei mynsien bru deiwa dat beiñ palat ya ki mrad.
Da kyntu u yaki pulit khamtam na ka chnat Cyber Cell wow chimkhia deiwa kem wei boodien ya ki bru wa pynpoor ya ki Video ha ka Internet, deiwa klam skem wa kitu ki bru toh kiwa emkti ha itai i thombor ya ki khynroo ka chnong.
Neiliang ka Pretty Kharpyngrope kawa man kam kawa e buit yong ka Seng Kynthei ha Madanrting da ong ko wa ym ye de wow pdiang ya ini i jia wei ym ye wow ong wa kitai kiwa chong chnong toh kiwa dang doom neibhah kammon tip ki wow pynpoor ya itai i jia ha ki Social Media.
U Rangbah Shnong ka Madanrting u Elves Kharkongor da i sñiawkhia da ong u wa ini i jia da pynbood naam ko ya ki rangbah ka chnong neibhah kitu ki khynroo ym poi pyrkhat ki wow liwan yung deilang waka metyap.
Da ong u wa neiliang ka chnong da syllok ko wa ka aiñ wa ym em uwon uwon wa em hok wow chim ya ka aiñ ha i kti, neibhah hawa em iwon iwon i jia toh i kamram yong ka chnong wow pyntip cha ka aiñ.
U Macmillan toh uwa kyrchaan yaka yung deiwa kit um
U Rangbah Shnong ka Madanrting, u Elves Kharkongor da pyntip u wa i khlaad noh yong u Macmillan Kharshandi na i chah thombor ha ki brukhloo ha i janmiet ka 8 tarik da man ko i dooh wa khroo ya ka yung ka sem neibhah wa uni u khynroo wa yarap wow kyrchaan lang ya ka yung deiwa yah kari kit um.
U Kharkongor da pyntip u wa ha i yaklam wa ka bei u Macmillan, da pyntip ko wa uni u khynroo toh uwa wanrah khoo ha yung deiwa kit um man ka sngi yow e bainong wa yoh u cha ka bei yow pyndap ya iwa emkaam ki chi payu.
Deiwa sñiawkhia mynsien, u Rangbah Shnong da kylli u ya kitu ki paidbhur kiwa chim yei mynsien yong utai u khynroo; lada sñiaw toh ki mo wow leh hadooh katni?
Discussion about this post