Hadien wa mih ka khubor wa ki ar tylli ki Hospital ha West Jaiñtia Hills Dist, ka Dr. Norman Tunnel Hospital (Mission Hospital) wa ka Civil Hospital Ialong da kyntait ki wow pdiang ya ka Meris Lyngdoh kawa na chnong Tongseng, EJHD, kawa thmu wow lai kha khon ha kini ki thaw sumaar heiwa ki wakreh ha ki ym du kyntait ki ya ka tangwa da klam lait ki leh ya kiwa hayung yong kani ka manbei.
Hajrong ini neiliang ka EJNC-Western Zone, lyngba ka wyrta na u President, u Training Phawa da beiñ joor ko ya kini ki thaw sumaar kiwa da kyntait wow pdiang ya kani ka manbei kawa pun-khon iwa da wanrah hei maa ya ka khamtam kam heini i por wa chem chitom bha ki bru kiwa wan na ki thaw palatsor.
Ka EJNC da kyntu ko leh ya ki bor wa pait ya kini ki thaw sumaar wow takit hajrong ini i jia khnang wow lait i wow jia biang neini chaphrang.
Da ong ko leh wa kam ka seiñ ymye ko wow pdiang ya ki kyntien wa klam sarong ki wakreh ha kini ki thaw ya ki paidbah heiwa ka seiñ da ong ko leh wa lada jia biang kamni daw leh ko yeiwa emkaam.
Neiliang u Sambormi Lyngdoh, President EJNC-CEC, da ong u wa neiliang ka seiñ da kyntu ko ya ka sorkar jylla lyngba u montri ka chnat i chait i khiah, u AL Hek, wow kyruiñ cha i eh i khoo wa i duna wa em ha ki Community Health Center (CHC) Khliehriat, neibhah kamwa man katni kani ka Hospital dang em ko chiboon i duna wei man i iwa eh ya ka wow chakri ya ki paidbah deiwa kyntu leh wow pynku kyrdan noh ya kani ka CHC cha ka Civil Hospital wa pura.
