Ka Coordination Committee on International Border (CCIB) ynne ka sngi da pynsñiaw ko wa ym pyrchah ko yei kær sainar chieh ha khappood wa ka Bangladesh, tangwa da dawa won ko wow kær namo wow leh ya ka Fencing ya u pood nadooh Zero Line.
U Chairman ka CCIB, u Sukkynjai Myrchiang da ong wa ki da pynsñiaw ki yei pyrchah wa e laad u Wansalan Dhar wow kær sainar ya ki thaw yong oo hadien wa da yoh u yei su naka sorkar, da khana u wa nadooh ka 3 tarik uni u bnai, ki bor sorkar da lai ki cha ka chnong Rongkong kawa haap hapoh ka Amlarem Sub-Division wow sdang yei kær sainar wot hapyrdi i pyrchah ki paidbah khamtam ki tre thaw.
Da khana u leh wa ha ka 5 tarik uni u bnai neiliang ki dkhot ka Khasi Student Union (KSU), Hynniewtrep National Youth Front (HNYF) waka Federation of Khasi Jaintia and Garo People (FKJGP) da lai ki cha ka chnong Rongkong yow pyrchah yei leh embor ka sorkar wow kær sainar 150 Yard chapoh wei neiliang ki seiñbhalang kiwa emlang wa ka CCIB da phah sangeh ki ya ini i kær sainar deiwa jai jai.
Da ong u wa ka CCIB burom ko yei rai yong kiwon kiwon ki tre thaw, tangwa iwa sñiawsih toh i jngai i thaw i yung u Wansalan ym man iwa che neibhah uni u dkhot wa chitrhem bha yong ka CCIB heipor wa lai e u yei thaw ym em da ya syllok næ pyntip lang ya ki dkhot hapoh ka Committee.
Hawa kylli, u Chairman ka CCIB da ong u wa katkam wa tip u, kiwa ha-yung u Wansalan kiwa da e yei thaw wow kær sainar. Hawa kylli chooh chooh da ong u wa i daw i pyrchah ya itai i kær sainar toh neidaw wa pyndooh mynsien ko ya kiwi ki tre thaw neibhah kamwa man katni, 99 na ki 100 ngut ki tre thaw pyrchah ki wei dawa ki wa ka sorkar toh u pynbait chwa ko ya u pood u ang dep te kær ya ki sainar nadooh Zero Line.
