Ynne ka sngi u Secretary ka Dorbar Chnong Khanduli, u Compromise Nongrum chirup wa u Waheh Chnong, u Yoshida Nongspung da beiñ joor ki ya ki bru samen kiwa luchia ya ki kaam khlem yoh bor na ka chnong.
Kam wow kdaw heini ha ka 16 tarik uni u bnai da pynman ya ka yalang hapyrdi ki Pnar na Khanduli wa ki jaitbru Karbi hapoh i yahkhmat ka Suching Amring Border Development Committee (SABDC) ha BOP Khanduli wei da ye u pynbait ya i sñiawthooh yumut hapyrdi ki ar jaitbru wei du hadien kattu sngi da mih ka Wyrta heiwa da pynbaad wei da klam mar kangtleiñ neiwa da rai wei yakut ha kani ka yalang.
Neiliang u Compromise Nongrum hawa yaklam wa u Wyrta da ong u wa i wym sñiawthooh yumut hapyrdi ki Pnar na Khanduli wa ki Karbi da neh i la chi snem tam wei ha ka yalang yong ka 16 tarik uni u bnai da ye u poi chei sñiawthooh hapyrdi waroh ar liang.
Da ong u leh wa lada em i bakla yong kiwon kiwon ha mar chiliang daw em i bahkhlieh na pyn arliang wow wanrah yei chongsuk.
Neiliang u Yoshida Nongspung da ong u wa ka yalang ha ka 16 tarik da man ko kawa jop tangwa sñiawsih won wow yoo wa em u bru samen uwa da pynmih khubor khlem yoh bor wei khlem tip yeiwa sakhiat heiwa iyi wa da rai ha kani ka yalang kamtæ ini da pynsñiawsih bha ko ya ki bor chnong wow yoo ya kam kani ka khubor.
Chooh chooh da ong u wa ki bru na baar chnong ymtoh u luchia ki ya ki kaam yong ka chnong wei ymye wow pdiang ya ki khubor kiwa pynmih na kam kini ki bru samen.
Puræ leh: E khubor thok uwa yahkhmat Karbi yei rai wa mih na ka yalang wa pynman ha Khanduli: Chairman HBDRF
Discussion about this post