Ka seiñ ki sahep IAS ka jylla Meghalaya kawa tip kam ka Meghalaya IAS Officers’ Association da beiñ joor ki yei pynbaad uwa e ktien ka TMC, u Saket Gokhale uwa da kam wa em i baam tooh, i pynemkaam bakla yaka poisa hawa pynkrehkaam yaka Meghalaya Eco Tourism Infrastructure Development Project.
Ka seiñ da ong ko wa ini waroh toh iwa thok suda wei wow yah bakla ya ki paidbah.
Ka seiñ da ong ko wa yieñ ko deilang wa u Dr. Vijay Kumar D, Commissioner and Secretary, Planning Department kamjooh u CMD ka Meghalayan Age Limited wa waroh kiwa da pynmih pyrtuid u Gokhale hawa phah u yaka kyrwoh khubor dei thmu wow pynsih yei pyrtuid kiwa kreh sorkar deiwa ong wa ki IAS toh kiwa kreh yow wanrah yei kaam pynroi ka sorkar katkam ki aiñ ka ri. Wei i pyrchang wow taanlang yei pyrtuid yong ki toh du ki kaam Politics donhi.
Katkam wa pynche u Dr. Vijay Kumar, waroh kiwa da leh, da leh katkam ki kyndon aiñ nadooh i khut Tender wei chwa ini u yoh yei mynjur naka New Development Bank (NDB) kawa da kyrchaan poisa ya ini wow pynkrehkaam yaka Meghalaya Eco Tourism Infrastructure Development Project. Wei kani ka kreh toh yow pynku ya ki kaam uiñke suwari yow pynku yaka jylla Meghalaya wei kini ki jait pynbaad da pynsih ko yei pyrtuid ka jylla.
Kamtæ ka Meghalaya IAS Officers’ Association da beiñ joor ko ya ini i pynbaad u Gokhale wei da kyrchaan ki yei pynche u Dr. Vijay Kumar kamjooh kiwi ki sahep sorkar.
Ka kyrwoh na u Dr. P. Sakhil Ahammed, President wa u C.V.D. Diengdoh, Secretary ka Meghalaya IAS Officers’ Association.
