Ka STIEH (Saiñdur Tipkur-tipkha Ieng Ehrngiew Hynñiewtrep) da pynsñiaw ko yei beiñjoor hajrong i jia ya kawi ka manbei ha Bakur, Dawki kawa chah khi khulooiñ wei chah datbeiñ hadooh wa da jngem ki kti ki kjat waroh.
Ka seiñ da dawa ko wow pynchitom katkam ka aiñ ya kiwa yahkhmat chnong kam ya u Secretary u Donstan D Khonglah wa ya kiwa yahkhmat ka Seng Kynthei Bakur ka Bobby Lamin, Jennifer Sumer kiwa da nood hadooh kat uni u pood wow chim yaka aiñ ha kti wow lehbeiñ ya kane manbei wa pli.
Ka STIEH da beiñ joor ko ya kitai ki kynthai ki wym em de yei sñiaw para kynthai wa u shñiooh toh i burom ya ka kynthai.
Chooh chooh da ong wa lada ka chnong chem ko wa kani ka bru da leh pyrchah ko yaka aiñ chnong, ileh ym em de mo kiwi ki laad wow pynsaja, em ki iyi i hok hadooh wow khi yow sñiooh wei wow tba kti yaka la kam kawa pynyap bru.
Ka aiñ hok manbru ym ye ko da kammon kammon leh wow pdiang ya ini i chah lehbeiñ ya kani ka manbei yong ki soo ngut ki khon. Ka seiñ ym ye ko wow pdiang yei pharep u waheh chnong u Daniel Khongsit wa toh ka hi kawa tyrwa wow khi sñiooh yong ka. Kiyi kiyi waroh wa klam u waheh chnong toh du wow tyllep ait miaw ya i leh yabor ya kani ka manbei.
Ka seiñ ka dawa joor ko wa ym toh u pynlait suk ya kini ki bru ki wym em de ya i sñiaw para bru katkam i yoh lum khubor wa yoh yutip wa nood ki wow leh pyrchah yaka aiñ hadooh katni toh neidaw wa kani ka bru toh kawa dooh wei da yoobeiñ yaka.
