Ka Thma U Rangli Juki (TUR) da beiñ ko yei rukom leh ka sorkar Meghalaya heiyatoh waka Meghalaya Lokayukta. Ka TUR da ong ko wa ini i leh ka sorkar pynyoo ko wa ka sorkar u Conrad Sangma kyrchaan ko ya ki kaam baam tooh hadooh wow khanglaad ya kawon kawon ka takit wa laitlooid wa yatoh wa ki kaam baam tooh wa ka sorkar em ko hajrong.
Da ong leh wa yaka aiñ Lokayukta hapoh Meghalaya da wan ko hadien wa da boon snem i yakhih paidbah yow pyntikna wa ka Lokayuktau man ko kawa laitlooid hei krehkaam yong ka wei kawa ym ye ka sorkar wow pynwit næ wow tuklar. Chooh chooh da ong wa ka sorkar u Conrad ym du wow pynslem ko wow pynkrehkaam ya kani ka aiñ da pyntikna ko leh wa ka Lokayukta man ko kawa khlem lameiñ. Deiwa yaleh pyrchah ya i krehkaam ka Lokayukta heiyatoh wa i challan tooh ya u mooyong hapoh ka yung bichaar pynyoo wa kwah u yada ya kiwa tyngkheiñ aiñ.
Ka TUR da pyntip ko cha ki paidbah kamjooh cha ka sorkar wa ka Lokayukta ym emkaam ko wow paan bor namo wow yoh bor neiwon neiwon yow pynman yaka takit pyrchah ya kiwon kiwon ki sahep sorkar hadooh u montri rangbah kiwa chah ujor katkam wa kdaw hapoh ka Prevention of Corruption Act.
Kamtæ ka TUR da dawa ko naka sorkar wa heithaw wow yada ya kiwa baam tooh, toh u chna ko ya ki laad ki luti yow pynman yaka takit katkam ki kyndon ka Meghalaya Lokayukta Act of 2014.
Ka TUR leh daw thooh laad ko katkam ka aiñ wow pyntikna wa ka sorkar leh ko yei kaam wa pynkit haka katkam ka aiñ wow pyndooh ya ki kaam baam tooh wa i biang i krehkaam ka Lokayukta.
Discussion about this post