I yachemlang yong ki bru waheh wasian yong ka thaaiñ khappood (Khanduli Area) wa da man ynnin ka 14 tarik ha chnong Khanduli da wan chimbynta ha ka nadooh u Chairman ka Lapangap-Khanduli Border Area JAC u Pyrkhatbha Pyrphet, u waheh chnong ka Khanduli u Y. Nongspung, u waheh chnong ka Umshangiar u E. Siangshai, u waheh chnong ka Umplu u J Suna, u waheh chnong ka Pdeintaloo u S. Nongrum, u Secretary chnong ka Lapangap u S. Sumer, u C. Motsun, u L. Laloo na saitsama, u M. Ramut, u K. Bina, u B. Kshiar, u M. Phawa, u T. Dkhar wa kiwi kiwi.
Ha kani ka sngi da beiñ joor ya ki nong Karbi kam ka KSA kawa ha ki Social Media ha ka 5 tarik uni u bnai wa da kam ki wa uwi u moopood ka Assam da em u hadooh ka chnong Saitsama wei da kam ki leh wa em u moopood ha yaw Khanduli wei ini i kam yong ki toh iwa ymye u pdiang wei ka wym em yurim iyi iyi leh.
Da beiñ leh ya i phut wa i tympiah ya u moomær ka PWD Meghalaya ha Zero Point Khanduli heiwa da suba wa ya ini da leh da ki bru Karbi. Deiwa ong wa ini i leh daw pynmih biang ko yei kynaad wa i sñiaw yaphær jaitbru.
Hajrong ini da kyrpaad ki wow em i burom mar kylliang wow pynneh ya i chongsuk ha ka thaaiñ deiwa kyrmen skem wa daw ye u pynbait noh ya u pood hapyrdi ka Assam wa Meghalaya uwa da ya kajia da ki phaw snem wa ha kani ka kynti daw mankaam ha kani ka sorkar kawa katni.
