U Lahkmen Rymbui uwa pait ya ka chnat Kaam Pohyung ka jylla, da pyntip u ynne ka sngi wa hadien i jia wa sñiawsih heiwa da dooh yei mynsien u Cherishsterfield Thangkhiew hadien wa lai kynreh ki pulit yei yung yong oo, da rai u wow pynlait noh yei kaam yong oo kam u Montri ki Kaam Pohyung deiwa thoh cha u Montri Rangbah wow chim noh ya kani ka chnat na oo nadooh myntu ka sngi.
Da ong u leh wa da leh ya ini khnang wa kawon kawon ka takit wa pynman da ka sorkar yow man ko kawa khooid yow lait u em iwon iwon i artatien ha ki paidbah wei da e yumut u ya u Montri Rangbah wa ya ka takit Judicial Inquiry toh u leh khnang wa iyi wa jia ha katu ka step synyaaw u mih pyrthai ko wei yow che ki paidbah.
Neiliang u President ka United Democratic Party (UDP), u Metbah Lyngdoh da ong u wa kam ka Party leh da mynjur ko ya ini i rai yong u Montri wei da chong ha u Montri Rangbah wow chim ya i rai hajrong kani ka chithi ieh kaam deiwa kyrpaad leh ya oo wow thung smat ya ka takit yow chem yeiwa jia sakhiat.
