U MLA ka BJP na Pynthorumkhrah, u Alexander Laloo Hek da beiñ joor u ya ka sorkar jylla hajrong i wymye ko wow kem næ pynchitom ya ki bru wa emkti wow thombor ya kiwi ki jaitbru, iwa da pynboodnaam ya ka jylla wei da pynmih leh ya i sñiawphær jaitbru.
Neiliang u Hek uwa man leh u National Executive Member ka Bharatiya Janata Party (BJP), ryngkat u Shiladitya Dev uwa man u Chairman ka Linguist Minority Board, yong ka sorkar Assam, da yachem ki ya u Lat ka Meghalaya, u Satya Pal Malik wow ujor hajrong i jia ha Shillong.
U Hek da ong u wa da ini i jia, ki tre chnong ka jylla da chah pynboodnaam ki, heiwa da ong u wa ki tre chnong ka jylla ymtoh kiwa sñiaw yaphær jaitbru, tangwa kiwa maya yei suk, tangwa em ki bru chim kabu kiwa ka sorkar ym em u leh ko iwon iwon, heiwa da beiñ ya kam ini i jia.
U Hek uwa man leh u Montri warim ka sorkar MDA, da beiñ u ya ka sorkar kawa krehlang ka BJP deiwa ong wa ka sorkar ym leh ko iwon iwon wei ki damok dang laitlan bha ki, wei kamwa jooh jia ym em wa chah kem uwi leh. Da ong u wa ym ye wow ong wa kattu katni ngut ki bru kiwa em yei thmu wow pynsihdur ya ka imlang sahlang.
U heh ka BJP da ong u leh wa ha i yachem wa u Lat, da kular u wow yaklam wa u Montri Rangbah ka jylla kamjooh ya u Montri ki kaam pohyung ka ri India, u Amit Shah wow leh yeiwa emkaam wym toh u e laad ya ki bru kiwa da pynsih yei pyrtuid ki tre chnong.
