U Montri wa pait ya ki Kaam Pohyung, u Lahkmen Rymbui da beiñ joor u yei chah dat ki khynroo kiwa dang lai puræ kiwa na Kerala ynnin ka sngi ha Jaiaw, Shillong deiwa ong leh wa ki pulit ki da pynman ki yei thooh ya ki bru wa emkti hadien wa da yoh ya ka ujor (FIR).
U Rymbui da ong u wa kam ini jia ym ye pdiang kawa da pynbood naam wei da wanrah yei ya choon.
Da ong u wa ka chnat pulit da leh ko ya iwa emkaam wei da pynsñiaw u leh yei kyrmen wa hapoh 48 kynta daw yoh u kem ya ki bru wa emkti.
Ha iwi i liang, u Director General of Police (DGP), u Dr. Lajja R Bishnoi leh da ong u wa ki pulit da booddien ki ya ini i jia wei da pait leh lyngba ki CCTV kiwa em ha i thaw wa jia yow chem ya kiwa emkti.
U DGP da kyntu u leh ya ki khynroo lane kiwon kiwon ki bru wow kiar ki na ki kaam wa pynmih ya ki huri hura wei da pynrap u wa lada em iyi iyi i wym sñiaw yahaap lane kiwa kwah wow pynsñiaw, ka chnat pulit smat ko wow ap wei wow yaklam pynsñiawthooh.
