I pynbaad hapoh ka Hima Sohra da ki Chairman wa da booh wow pait ya ki kyntoit ya ka chnong Majai ynne ka sngi da kini ki bru kiwa ymtoh ki Khasi kiwa da pynbaad ki wa ynnin ka sngi da mih i kyntien wa pynbor ya ki da kiwa synchaar Hima, deiwa kam leh wa ka Hima Sohra da khut hajir ko ya ki ha ka 24 tarik deiwa pynbor wow klam ki katkam wa phah ki bor wa synchaar Hima hapoh i yahkhmat u Syiem Khynnah wei da riñ dur (Video) ya ki.
Hajrong ini i kylla ktien kini ki baar jylla, neiliang u Secretary ka Hima Sohra, u BV Rymmai da beiñ u yeiwa klam ki deiwa ong wa ha ka yalang wa man ha ka 24 tarik uni u bnai kini ki bru da kubur ki wa 95% ki dukan yong ki baar jylla da wai ki khlem em iwon iwon i yoobeiñ ya kiwi tawon ki jaitbru.
U Rymmai da ong u leh wa lada kam ki wa chah lehbeiñ ki, neiyi i daw wym ujor ki cha ki bor ka aiñ wei yaka kamai kajih leh ym ye wow khang heiwa ka Hima tang ya ki khon yong ka leh ymye ko wow pyndap yeiwa emkaam ki.
Chooh chooh da ong u wa i pynbaad pyrchah ya ka yung krehkaam u Syiem wa ym e ko ya ka No Objection Certificate wa kiwon kiwon ki kot ki sla wa emkaam, neiliang u Secretary ka Hima da beiñ u yeini deiwa kylli wa kammon ki bru kiwa em 20-30 snem i rta dang lai paan Birth Certificate ki wa kiwi ki kot chnong wa ka EPIC, wei ini da pynartatien ko ya ki wa ye ki u wan na cha baar ka ri khamtam kiwa chong ha chnong Majai.
