Yow chim kabu ya ka Scheme sorkar, ki ar ngut kiwa chi payu da ya bia ki ha Hathras, Uttar Pradesh heiwa ha ini i bia da chimbynta kiwi kiwa chi jur kawa da pynman hapoh ka Mukhyamantri Samuhik Vivah Yojana Scheme yow yarap ya kitu ki wym dap poisa wow bia.
Ya kini kiwa chi payu da chem ki hadien wa em wa ujor ha u Sub-Divisional Magistrate uwa da phah wow pynman yei takit.
Hapoh kani ka Scheme, ka kynthai da yoh yarap ko Rs. 35,000 kawa phah cha ka Bank Account ko wei da yoh ki leh ki tiar yarap kiwa chongdor Rs. 10,000 nadooh ki khadu, kpieñ, ki kchu deilang wa Rs. 6000 yow pyndap yei lut phut.
Ini ymtoh de i sien wa nynkong wa jia kamni ha UP heiwa ha u Wisu (Mar) uni u snem leh da em kam ini i jooh wa jia ha Maharajganj District kani ka jylla heiwa da em kiwa chi payu wa bia yow chim kabu ya kani ka Scheme heiwa ha kani ka kynti ka kynthai toh kawa dadep bia chwa.
Najrong ini leh em ki bor sorkar kiwa pynman chynnam ya kini ki bia yow chna poisa ki deiwa khut hi-eh ki bru kiwa bien u chimbynta deiwa e nong ya ki katwa ya ka poisa lai ko cha kata ki bru sorkar.
Kani ka Scheme kawa hei kyntien pharæng toh kawa tip kam ka Mass Wedding Scheme da sdang ha u Naichiphaw 2017, yow lait kiwa wan na ki manyung wa dooh wa duk wow pynlut phut kamjooh leh yow lait ki u dooh u bia.
Ka kyndon toh hawa pynman ya kini ki Mass Wedding ymtoh u duna wow em 10 jur.
Discussion about this post