Jowai: Ka Jaiñtia Youth Federation (JYF), hapoh i yahkhmat u President yong ka u Poipynhun Majaw da hiar yachem ko ya u SP ka East Jaiñtia Hills u S. Thamar wow takit bniah yei chah bom wei lute poisa u Batskhem Pala hadooh T. 4,500 na uwi u wa yarap yah truck (spare driver) wa tip kam u Eyoudicious Dkhar wa 34 snem, na ka truck wa em u No. NL01 G 5115 ha Lad Rymbai, Ladmoolamonoh, East Jaiñtia Hills.
U SP ka EJH da khana u wa hadien wa chah bom u da thooh ki oo (Batskhem) wow e yarap ya oo katkam wa da mih na i Video wa chah dat u.
Katwa dang thooh ki oo da em ki paidbah wa wan booh oo u Batskhem cha thanat hadien wa pynmynsoo wei lute u oo u Eyoudicious Dkhar ha ka miet yong ka 27 tarik.
U Batskhem katni em u hapoh ka Judicial Custody ki pulit ha Jowai District Jail.
Da pyntip u SP wa u Batskhem da tip ya oo boon tylli ki pyrtuid neibhah ha Umkiang da tip ya oo kam u Forpunet wei da wiar u la ar snem nadooh wa yut u ka ka kurim u wei da tip ya oo kam u Fridi wa u Friday.
Da khana u leh wa u Batskhem toh uwa na Rupasara, Barak Valley, Assam wei em u kamwa 20 snem i rta katkam ka Baptismal Certificate wa yoh na ka bei u heipor wa pynbaptist ya oo ha Balang Presbyterian, Rupasara wei kani ka Certificate da khana wa da kha ya oo ha ka 13 Naitung 1997.
Neiliang ka JYF da kyntu ko ya u SP wow chimkhia hei yatoh wa kini ki ar tylli ki kaam kiwa kynthup ya i chah bom u Batskhem wei i lute u.
Ka seiñ da kyntu ko leh ya kiwa emkti wow bom ya u Batskhem Pala wow wan pyndem noh ki ha ki pulit.
Discussion about this post